දියත

තැපැල් ඡන්ද ප්‍රතිඵල වෙනම කියන්නේ නෑ

මෙවර පළාත් පාලන මැතිවරණයේ ප්‍රතිඵල ප්‍රකාශ කරන අවස්ථාවේ ඒ ඒ පළාත් පාලන ආයතනයට අදාළ තැපැල් ඡන්ද ප්‍රමාණය වෙනම ප්‍රකාශ නොකරන බව මැතිවරණ කොමිසම පවසයි.

ඡන්දෙට විදේශීය නිරීක්ෂකයන් නෑ

පළාත් පාලන මැතිවරණය සඳහා කිසිදු විදේශීය නිරීක්ෂකයකු සහභාගී කර නොගන්නා බව මැතිවරණ කොමාසසේ සභාපති මහින්ද දේශප්‍රිය මහතා ඊයේ පැවසීය.

පෙර අමනාපයට අයියා මලෝ ඇසිඩ් ගහලා

සහෝදරයින් දෙදෙනෙක් එල්ල කරන ලද ඇසිඩ් ප්‍රහාරයකින් තුවාල ලබා එක් අයකු මාරවිල මූලික රෝහලට ඇතුළත් කිරීමෙන් පසුව වැඩිදුර ප්‍රතිකාර සඳහා කොළඹ ජාතික රෝහලට මාරු කර යවා ඇති බව කොස්වත්ත පොලීසිය කියයි.

මීරිගම සිසුවකු අතුරුදහන්

මීරිගම නගරයේ පැවැති පෙරහරක් බැලීමට පසුගිය 24 වෙනිදා ගිය 14 හැවිරිදි පාසල් සිසුවකු අතුරුදන්වීමේ සිද්ධියක් සම්බන්ධයෙන් පරීක්ෂණයක් ආරම්භ කර ඇතැයි මීරිගම පොලිසිය කියයි.

මහේස්ත්‍රාත්ට තර්ජනය කරයි තිදෙනක් රිමාන්ඩ්

හැටන් මහේස්ත්‍රාත් සර්වන රාජා මහතාට අසභ්‍ය වචනයෙන් බැන වැදුණේ යැයි කියන පුද්ගලයන් තිදෙනකු ලබන ජනවාරි 03 වැනිදා තෙක් රිමාන්ඩ් කරන ලෙස කැකිරාව වැඩබලන මහේස්ත්‍රාත් රවීන්ද්‍ර බංඩාර මහතා අද (26) නියෝග කළේය.

මත් පෙති සිද්ධියකට ආරච්චි වරයකු රිමාන්ඩ්

රුපියල් දෙකෝටි විසි හය ලක්ෂයක් පමණ වටිනා මත් පෙති 7564 ක් සන්තකයේ තබාගැනීම සහ ඊට ආධාර අනුබල දුන් බව කියන කොළඹ දිසා අධිකරණයේ ආරච්චි වරයකු සහ ඔහුගේ ඥාති සොහොයුරා ලබන 05 වැනිදා තෙක් රක්ෂිත බන්ධානාගර ගත කරන ලෙස කොළඹ අතිරේක මහෙස්ත‍්‍රාත් දමින්ද වැලිගොඩපිටිය මහතා අද (26) නියෝග කළේය.

සෞදියේ දි මිය ගිය කාන්තාවගේ මෘත දේහය ලංකාවට

සෞදියේ ගෘහ සේවයට ගොස් තෙමහල් ගොඩනැගිල්ලකින් වැටී වසර තුනක කාලයක් එරට රෝහලක ප්‍රතිකාර ලබමින් සිටි සිය මව මියගොස් මාසයක පමණ කාලයක් ගත වී ඇති බවත් මවගේ මෘත දේහය මෙරටට ගෙන්වා දෙන්නැයි කැකිරාව කිතුල්හිටියාව ප්‍රදේශයේ පුතෙකු මාධ්‍ය මගින් ඉල්ලීමක් කළේය.

තැපෑලෙන් හෙට රටපුරා විරෝධතා

තැපැල් දෙපාර්තමේන්තුවේ බදවාගැනීමේ පටිපාටිය විධිමත් කරන බවට බලධාරීන් කිහිප අවස්ථාවකදී ලබා දුන් පොරොන්දු දිගින් දිගටම කඩ කිරීම නිසා හෙට (27) දිවයින පුරා ප්‍රධාන නගරවල විරෝධතා පවත්වන බව තැපැල් වෘත්තීය සමිති එකමුතුවේ සම කැඳවුම්කරු කේ.ආර්.වර්ණකුලසුරිය මහතා පැවසීය.

මැතිවරණ ලොක්කා පක්ෂ ලේකම්වරු කැඳවයි

මැතිවරණ කොමිසමේ සභාපති මහින්ද දේශප්‍රිය මහතා හෙට (27) සියලු දේශපාලන පක්ෂවල ලේකම්වරු කොමිසමේ කාර්යාලයට කැඳවා ඇත.

කිතුල්උතුව වැසියෝ ත්‍රිමලය - කොළඹ පාර අවහිර කරති

තම ජිවිතවලට සහ ගම්මානයට වල් අලින්ගෙන් සිදුවන හානි වහාම නවත්වන ලෙස ඉල්ලා ති‍්‍රකුණාමලය කොළඹ ප‍්‍රධාන මාර්ගයේ කිතුල්උතුව ගම්මානයේ ජනතාව අද(26) මාර්ගය හරස් කරමින් උද්ඝෝෂණයක නිරත වුහ.

ශ්‍රී මහා බෝ අංකුරයක් තායිවානයට

ඓතිහාසික ශ‍්‍රී මහා බෝ සමිඳුන්ගේ අංකුරයක් තායිවානයට වැඩම කරවීමේ උත්සවයක් අද (26දා) පෙරවරුවේ අනුරාධපුර ජය ශ‍්‍රී මහා බෝ සමිදුන් අභියසදී සිදු කෙරිණි.

එජාපයෙන් තුනක් ශ්‍රීලනිපයට එක්වෙති

කැළණිය ආසනය නියෝජනය කළ එක්සත් ජාතික පක්ෂ කි‍්‍රයාකාරීන් පිරිසක් අද(26) ජනාධිපති නිල නිවසේදී ජනාධිපති මෛතී‍්‍රපාල සිරිසේන මහතා හමුවී ජනපතිගේ වැඩපිළිවෙළට සහාය පළ කරමින් ශී‍්‍ර ලංකා නිදහස් පක්ෂය හා එක්වූ බව ජනාධිපති මාධ්‍ය අංශය පවසයි.

පරාක්‍රම සමුද්‍රයේ තාවුල්ලට අලි ඇවිත්

පොළොන්නරුව පරාක්‍රම සමුද්‍රය වැව් තාවුල්ලෙ සවස් කාලයේ සැරිසරන වල් අලින් මේ දිනවල සුලභව දැකිය හැක. මාස කිහිපයක නියඟයෙන් පසුව ඇති වූ වර්ෂාවත් සමඟ දලුලා වැවෙන තණ කොළ ආහාරයට ගැනීමටත් සංචාරක හෝටල්වලින් ඉවත ලන ආහාර ද්‍රව්‍යයන් කෑමටත් මෙම අලින් හුරුවී තිබෙන බව ප්‍රදේශවාසීහු කියති.

රිෂාඩ් බදුර්දීන් ඇමැතිකමින් ඉවත් කළ යුතුයි - ඥානසාර හිමි

විල්පත්තු වන සංහාරය ගැන විගණකාධිපති ප‍්‍රමුඛ කමිටු වාර්තාවට අනුව පරීක්ෂණ වලට ඉඩදී රිසාඞ් බදියුදීන් මහතා ඇමතිකමෙන් ඉල්ලා අස්නොවන්නේ නම් ඔහුව කණෙන් ඇදලා එළියට දැමිය යුතු යැයි බොදු බල සේනා සංවිධානයේ මහලේකම් ගලගොඩඅත්තේ ඥානසාර හිමියෝ පැවසූහ.

චීන ජාතිකයෝ තිදෙනෙක් අවුකනදී තාවකාලික පැවිද්ද ලබති

චීන ජාතික මහාචාර්යවරයකු ඇතුළු තවත් දෙදෙනෙකු අවුකන බුද්ධ ප්‍රතිමාව ඉදිරිපිට දී තාවකාලික පැවිදි භාවය ලබා ගැනීම අද(26) බුද්ධ ශාසන අමාත්‍ය ගාමිණී ජයවික්‍රම පෙරේරා මහතාගේ ප්‍රධානත්වයෙන් සිදු කෙරිණි.

වව්නියාව බස් සේවකයෝ අදත් ඇවිලෙති

උතුරු පළාත් ප්‍රධාන අමාත්‍යවරයාගේ නියමයට අනුව පෞද්ගලික බස් හා ලංගම බස් ධාවනය නව බස් නැවතුම්පළේ සිට ක්‍රියාත්මක කරන ලෙසට දුන් දැනුම්දීමට අනුව පෞද්ගලික බස් නව බස් නැවතුම්පොළට ගියද ලංගම බස් රථ එහි නොයෑම හේතුවෙන් අද (26) දෙපාර්ශවය අතර වූ උණුසුම් තත්වය පලානය කිරීමට වව්නියාව පොලීසියට මැදිහත් වීමට සිදු විය.

මාගම්පුර වරායේ මුදල් ලැබෙයි

හම්බන්තොට වරායේ මෙහෙයුම් කටයුතු පැවරීම නිමිත්තෙන් ශ්‍රී ලංකා වරාය අධිකාරිය සහ සීමාසහිත චයිනා මර්චන්ට් පෝර්ට් හෝල්ඩින්ග් සමගම අතර අත්සන් තබන ලද ගිවිසුමට අනුව ශ්‍රී ලංකාවට ලැබිය යුතුව තිබූ ඇමෙරිකන් ඩොලර් මිලියන 292.1 ක මුදල ලැබුණු බව ශ්‍රී ලංකා මහ බැංකුව සඳහන් කරයි.

දෙහිවල සතුන්වත්තේ ආදායම ඉහළට

පාසැල් නිවාඩු සමය ආරම්භ වීමත් සමග දිවා රෑ දෙකෙහිම දෙහිවල සත්වෝද්‍යානයට පැමිණෙන නරඹන්නන්ගේ සංඛ්‍යාව ඉහළ යෑම නිසා දිනෙක ආදායම ලක්ෂ දොළහකින් වැඩි වී ඇතැයි දෙහිවල සත්වොද්‍යාන ආරංචි මාර්ග පවසයි.

හක්මන වැසියෝ දිස්ත්‍රික් ලේකම් කාර්යාලය වටලති

මාතර හක්මන පාර පුළුල් කිරිමේදී හා ගංවතුර අලාභ හානි වෙනුවෙන් වන්දි බෙදා දීමේදී තමන්ට අසාධාරණයක් සිදු වී ඇතැයි පවසමින් මාතර හක්මන පාර දෙපස පදිංචිකරුවෝ අද(26) මාතර දිස්ත්‍රික් ලේකම් කාර්යාලය තුළට කඩා වැදුණහ.

උතුරු දේශපාලකයන් ආරක්ෂා කරන්නේ සිංහල පොලිස් නිලධාරීන්

උතුරු පළාතේ ද්‍රවිඩ දේශපාලන නායකයින්ගේ ආරක්ෂාව සපයන්නේ සිංහල පොලිස් නිලධාරීන් බවත් මෙම ක‍්‍රියාවම සහජීවනයට හොඳ මාවතක් බවත් උතුරු පළාත් ආණ්ඩුකාර රෙජිනෝල්ඩ් කුරේ මහතා පැවසීය.

සුනාමි ව්‍යසනයට වසර 13යි

දළ පූට්ටුවාගේ ඝාතන සැකකරුවන් යළි රිමාන්ඩ්

ගල්ගමුවේ දළ පූට්ටුවාගේ ඝාතනය සම්බන්ධයෙන් සැකපිට රිමාන්ඩ් භාරයේ සිටින සැකකරුවන් 9 දෙනා ලබන ජනවාරි 9වැනිදා තෙක් යළි රිමාන්ඩ් කරන ලෙස මහව අතිරේක මහේස්ත්‍රාත් හා අතිරේක දිසා විනිසුරු රසික මල්ලවාරච්චි මහතා අද(26) නියෝග කළේය.

පුදුකුඩුඉරිප්පු කැළේ හෑරූ 11ක් අත්අඩංගුවට

යුද සමයේදී එල්.ටී.ටී.ඊ. සංවිධානය විසින් වලදමන ලද බවට සැකකෙරෙන මුදල් හා රත්තරන් තොගයක් ගොඩගැනීමට මුලතිව් පුදුකුඩුඉරිප්පු කයිවේලි කැලෑවේදී උත්සහ ගත් 11 දෙනෙකු අත්අඩංගුවට ගෙන ඇති බවට පුදුකුඩුඉරිප්පු පොලීසිය කියයි.

සුනාමි සැමරුම් රටපුරා

සුනාමියට බිලිවූ අය සමරා කතරගම පුද බිමෙහි අද (26) පිංකම් රැසක් පැවැත්විණි.

මුහුදේ ගිලී දෙදෙනෙක් මරුට

නත්තල සැමරීමට කටුනේරිය මුහුදු වෙරළට ගොස් විනෝද වෙමින් සිටිය දී රැල්ලට හසුවි ගසා ගෙන ගිය අයෙක් හා ඔහු බේරාගැනීමට ගිය අයෙක් මුහුදුට ගසා ගෙන ගොස් ඇත.

නත්තල් සාදයකදි ඇති වූ ගැටුම දුර දිග යයි

වෙන්නප්පුව දකුණු උල්හිටියාව ප්‍රදේශයේ නිවසක අද (25) පැවති නත්තල් සාදයකදි නිවසේ හිමිකරු සහ නිවසට පැමිණි පිරිසක් අතර ඇති වූ ගැටුමකදි නිවෙස් හිමිකරු ස්වංක්‍රිය ගිනි අවියක් පෙන්වා බෙල්ලට පිහියකින් ඇණ තම ඥාති මාමා කෙනෙකුට බරපතල තුවාල සිදුකර තිබේ.

හෙරොයින් සමඟ තිදෙනෙකු ශ්‍රි පාදයේ දි අත්අඩංගුවට

මිහින්තලේ ප‍්‍රදේශයේ සිට ශ්‍රි පාද වන්දනාවේ පැමිණි නඩයක සිටි තරුණයන් තිදෙනෙකු හෙරොයින් ඇතුලූ මත්ද්‍රව්‍ය සමඟ සැකපිට අත්අඩංගුවට ගත් බව නල්ලතන්නිය පොලිසියේ ස්ථානාධිපති ප‍්‍රධාන පොලිස් පරික්‍ෂක ලක්සිරි ප‍්‍රනාන්දු මහතා ප්‍රකාශ කළේය.

සාම පාගමන බෝධිරාජාරාමයට

සාම පාගමනක යෙදී සිටින තායිලන්ත භික්ෂූන් වහන්සේලා ඇතුළු පිරිස අද(25) සවස කලාඔය සිරි විජය බෝධිරාජාරාමයට වැඩම කරවූ වගයි.