වටිනා රන් භාණ්ඩ දමා තිබූ රෙදි උරය ඇත්වැරදීමකින් ප්‍රදේශයේ කසළ එකතු කරන ලොරියට දමා තිබියදී පසුව සොයාගත් සිද්ධියක් නාගරික ප්‍රදේශයකින් අසන්නට ලැබිණි. 

සිද්ධිය සැකෙමින් මෙසේය. 

නිවස ඉදිරි දිනයෙක පැවැත්වෙන උත්සවයක් සඳහා සූදානම් කරමින් තිබිණි. 

ඥාති හිතවතුන් පැමිණ නිවස ඇතුළත හා පිටත ශුද්ධ පවිත්‍ර කිරීමට උදව්වී තිබෙන අතර එහි ගේ මුල්ලක රෙදි උරයක් තිබී ඇත. එය පරීක්ෂා නොකළ අයකු ඒ තුළට තවත් කසළ දමා පාරේ ගිය ප්‍රදේශයේ කුණු ලොරියට දමා තිබේ. 

පසුව නිවසේ හිමියාගේ බිරියට රෙදි උරය මතක්වී සොයන විට එය තිබූ තැන නොතිබුණු නිසා කලබලවී සොයනවිට කෙනකු පරණ රෙදි උරය කුණු ලොරියට දුන්නා යැයි කියා ඇත. ඒ කතාවෙන් තවත් කලබල වූ නිවසේ කෙනෙක් ලොරිය සොයා දිවගොස් ඇත. 

ඒ වනවිටත් කුණු ලොරිය අදාළ කසල අංගනය වෙත ගොස් අවසන්ය. 

සේවකයෝ කසළ බෑමට සූදානම් වනවිට අනේ මල්ලිලා පොඞ්ඩක් ඉන්න මගේ වටිනා උරයක් වැරදීමකින් කසළ ගොඩට වැටිලා යැයි පැමිණි අය කියා ඇත. බලන්න බලන්න හොඳට බලන්න අපිට නම් වටිනා දෙයක් හම්බ වුණේ නෑ යැයි සේවකයෙක් එවිට කියා ඇත. 

පසුව තවදුරටත් ලොරියේ කුණු පරීක්ෂා කරද්දී එහි කොනක පරණ රෙදි උරය තිබෙනු දැක එය බලද්දී රත්තරං බඩු තිබී ඇත. ඇති යාන්තං හම්බ වුණා. බැංකුවෙන් බේරාගෙන ආවේ පෙරේදා. තව පොඞ්ඩෙන් ලක්ෂ 10ක විතර රත්තරං කුණු යටම යනවා යැයි පවසමින් ඉහවහ ගිය සතුටෙන් කුණු අදින මල්ලිලාටත් පිං දෙමින් පැමිණි අය රන් උරයත් ගෙන පිටත්ව ගියේය. 
(වැල්ලම්පිටිය ශාන්ත සෙනෙවිරත්න)