(අංජුල මහික වීරරත්න)
රට ගොඩනගන ජාතික පිළිවෙත එළිදැක්වීමේ උත්සවය සඳහා අතුරලියේ රතනහිමියන්ගේ පන්සලට ගියේ රනිල් වික්‍රමසිංහ නායකතුමන්ගේ අවසරයගෙන බවත් එම උත්සවයට තමාට අරාධනාකර ඇතැයි කී විට රනිල් වික්‍රමසිංහ මහතා තමාට එහි යන ලෙස පැවසු බවත් එක්සත් ජාතික පක්‍ෂ පාර්ලිමේන්තු මන්ත්‍රී වසන්ත සේනානායක මහතා මාධ්‍ය හමුවකදී අද (02) පැවැසීය.

එක්සත් ජාතික පක්‍ෂ නියෝජ්‍යනායක සජිත් ප්‍රේමදාස මහතාටද එම උත්සවයට ආරාධනාකර තිබූ බව කී සේනානායක මහතා හම්බන්තොට රැස්වීමක්හේතුවෙන් ඔහුට එහි පැමිණීමට නොහැකි බව දැනුම්දුන් බවද සඳහන් කළේ ය. කිසිවිටක නැවත යාමට බලාපොරොත්තුවක් නැති බවද මන්ත්‍රීවරයා පැවසීය.

කෙසේවෙතත් යහපාලන ආණ්ඩුවේ අවසානය ගැන සතුටට පත්වන බවද ඒ ආණ්ඩුව නිසා පීඩාවට පත්ව සිටියේ එක්සත් ජාතික පාක්ෂිකයන් බවද පැවසූ සේනානායක මහතා එක්සත් ජාතික පක්‍ෂ රජයක් බිහිවනවාට අසතුටු බව ඒ කතාවෙන් අදහස් නොකරන බවද කීය.

බහුතරයක් නැති නීත්‍යානුකුල නොවන ආණ්ඩුවේ කුඩැල්ලෙකු සේ එල්ලී සිටීමට නොහැකි නිසා නැවත පැමිණි බවද තමාට ගෞරවයක් කළ මෛත්‍රී- මහින්ද නායකයන් දෙදෙනාට පයින් ගසනවා වැනි දෙයක් සිදුවී දැයි ශෝකයක් තමන් නැවත පැමිණිමේදී ඇතිවු බවද වසන්ත සේනානායක මහතා වැඩිදුරටත් සඳහන් කළේය.

කොළඹ අරලියගහ මන්දිරයේදී මෙම මාධ්‍ය හමුව පැවැත්විණි.