(අජන්ත කුමාර අගලකඩ)  

පක්ෂයේ ප්‍රතිසංවිධාන කටයුතු සඳහා 16 දෙනාගේ කණ්ඩායම යන ප්‍රදේශවලට ආණ්ඩුවේ සිටින ශ්‍රීලනිප මැති ඇමැතිවරුන් 23 දෙනා සහභාගි නොකරන්නැයි ආණ්‍ඩුවෙන් ඉවත් වූ ශ්‍රීලනිප 16 දෙනාගේ කණ්ඩායම ජනාධිපති මෛත්‍රීපාල සිරිසේන මහතාගෙන් ඉල්ලීමක් කර ඇත. 
 

දහසය දෙනාගේ කණ්ඩායම ඉකුත් බ්‍රහස්පතින්දා (14) ජනාධිපති කාර්යාලයේ දී ජනාධිපති මෛත්‍රීපාල සිරිසේන මහතා හමුවී මෙම ඉල්ලීම කර ඇති බව වාර්තා වේ.  

ශ්‍රී ලංකා නිදහස් පක්ෂය ආණ්ඩුවෙන් ඉවත්විය යුතු බව 16 දෙනාගේ කණ්ඩායම ප්‍රසිද්ධියේ කියා සිටියදී ආණ්ඩුවේ සිටින ශ්‍රීලනිප මැති ඇමැතිවරුන් කිහිප දෙනකු ශ්‍රීලනිපය එජාපය සමග දිගටම ආණ්ඩුව කරන බවට ප්‍රකාශ කිරීම මෙම ඉල්ලීම කිරීමට හේතු වී ඇතැයි පැවැසේ.  

මෙවැනි තත්ත්වයක් තුළ, ඔවුන් සමග ගොස් පක්ෂ ප්‍රතිසංවිධාන කටයුතු සිදුකළ නොහැකි බව 16 දෙනාගේ කණ්ඩායම ජනාධිපතිවරයා හමු වී ප්‍රකාශ කර ඇත. ශ්‍රීලනිප 16 දෙනාගේ කණ්ඩායම යන ප්‍රතිසංවිධාන කටයුතුවලට ආණ්ඩුවේ ශ්‍රීලනිප මැති ඇමැතිවරුන් සම්බන්ධ වන්නේ නම් තමන් ඊට සහභාගි නොවන බව 16 දෙනාගේ කණ්ඩායම ජනාධිපතිවරයාට දන්වා ඇතැයි වාර්තා වේ.  

මෙම සාකච්ඡාවට 16 දෙනාගේ කණ්ඩායමෙන් මන්ත්‍රීවරු 12 දෙනෙක් ද, ශ්‍රී ලංකා නිදහස් පක්ෂයේ නව මහලේකම් මහාචාර්ය රෝහණ ලක්ෂ්මන් පියදාස මහතා ද සහභාගි වූහ.