බුලත්විට කෑමට  තදින් ඇබ්බැහිවූ තම බෑනාට ගෙට ගෙවදින උත්සවයේදී තෑගි ලෙස පඩික්කමක් ගෙන ගොස් දුන් මාමණ්ඩියකු පිළිබඳ පුවතක් කෑගල්ල ප‍්‍රදේශයේ ගමින් වාර්තා වෙයි. සිද්ධිය මෙසේය. විවාහ වී දරුමල්ලන් කීප දෙනකු ද සිටින බෑනා තවමත් පදිංචිව සිටින්නේ මාමණ්ඩියගේ නිවසේමය. රියදුරු රැකියාව කරන බෑනා තදින්ම බුලත්විට කෑමට ඇබ්බැහිවීම පිළිබඳව මාමා සිටින්නේ දැඩි කේන්තියෙනි. ඊට හේතුව නිවසේ ඉදිරිපස  පිළ ද මිදුල ද අලංකාර මල් පඳුරු ද බෑනාගේ බුලත්විට කෙළවලින් නිතරම දුර්වර්ණ වී අපවිත‍්‍රව පැවතීමය. මේ අවනඩුව පිළිබඳව වරක් දෙවරක් නොව සිය වතාවකටත් වඩා බෑනා හා මාමා අතර උණුසුම් වචන හුවමාරු වුව ද ඔහුගේ බුලත් විට කෑම නැවැත්වීමට මාමා අපොහොසත් විය. මේ අතර කලකට පසුව සියලූ දෙනාගේ උදව් උපකාර ඇතිව මාමාගේ නිවසට තරමක් දුරින් බෑනා නව නිවසක් ඉදිකිරීම ආරම්භ කළේය. බෑණා නව නිවස  ඉදිකොට ගෙන තම නිවසින් තොලොංචි වී යන්නේ කවදාදැයි මාමා දිනගනිමින් පසුවිය. බෑණාගේ  ගෙට ගෙවදින දිනය දැන ගැනීමත් සමගම මාමාට තරමක ගැටලූ සහගත තත්ත්වයක් උදාවූයේ එදිනට ලබාදෙන්නේ කුමක්දැයි කල්පනා වීමත් සමඟය. මේ පිළිබඳව කීප දෙනකුගේ අදහස් විමසීමෙන් අනතුරුව එක් පුද්ගලයකු අපූරු යෝජනාවක් කළේය. ”මහත්තයෝ බෑණාගේ විට කෑමටත්  තැන නොතැන නොබලා කෙළගැසීමටත් දැනමුතුකමක් දෙන්න අපි බෑණාට පඩික්කමක් තෑගි  දෙමු.” මේ අදහසින් පසුව නගරයට ගිය හෙතෙම කඩ කීපයක සෝදිසි කිරීමෙන් අනතුරුව පන්සල්වල පාවිච්චියට ගන්නා ලොකුම ප‍්‍රමාණයේ පඩික්කමක් හොඳහැටි පාර්සල් කරවාගෙන පැමිණියේය. බෑණාගේ ගෙට ගෙවැදීමේ  සාදය ඉහළින් පැවැත්විණි. ඔහු තම බිරිඳටත් නොකියා රැගෙන ගිය පඩික්කම සහිත පාර්සලය බෑණා අතට දුන්නේය. පසු දින පාර්සල් එකිනෙක විවෘත කරන අතරතුර බෑණා පඩික්කම සහිත පාර්සලය ද විවෘත කළේ බිරිඳ හා දූ දරුවන් සියලූ දෙනාගේ සිනා හඬ මැදය. දැන් මේ ආරංචිය ඔහුගේ ඥාතීන් සියලූ දෙනා අතර පැතිරී ඇතත්  ඔහුගේ විට කෑම නං අඩු වී නැත.