බගවන්තලාව පසුගියදා රටේම කතාබහට ලක්වූ නගරයක් බවට පත්විය. ඒ හොඳ හේතුවකට නොව නරක හේතුවකටය. වත්මන් ආණ්ඩුවේ කැබිනට්ටුවේ ලාබාලම අමාත්‍යවරයා වන ජීවන් තොණ්ඩමන් මහතා පැය කිහිපයකට බගවන්තලාව පොලිසිය තමන්ගේ අණසකට යටත් කර ගැනීම හේතුවෙන් මේ කලබැගෑනිය හටගෙන තිබිණි.

තම ආධාරකරුවන් පිරිසක්ද රැගෙන බගවන්තලාව නගරය මැදට ගොස් පොලිස් ස්ථානාධිපතිටත් සෙසු පොලිස් නිලධාරීන් කිහිප දෙනකුටත් බැණ තර්ජනය කිරීම රටේම ජනතාව මාධ්‍ය හරහා දැකබලා ගත්හ. අනුන්ගේ බැංකු ගිණුමක තොරතුරු ඉල්ලා කලහ කරගත් තම ආධාරකරුවකු ඇල්ලු‍වාට අමාත්‍යවරයා කෝපවීම මීට හේතුවය.

දකුණු ඉන්දීය චිත්‍රපට නැරඹීම ජීවන් තොණ්ඩමන් අමාත්‍යවරයාගේ විනෝදාංශයක්දැයි අපි නොදනිමු. එහෙත් එදින තොණ්ඩමන් අමාත්‍යවරයා තම ආධාරකරුවන් ඉදිරියේ රඟදැක්වූයේ දකුණු ඉන්දීය කසිකබල් චිත්‍රපටයක කාඩ්බෝඩ් වීරයකුගේ චරිතයක් බව දකින්නට තිබිණි. ලංකා කම්කරු කොංග්‍රසයේ තම ආධාරකරුවන් සමඟ එකතු වී ඔහු පොලිස් ස්ථානාධිපතිට තර්ජනය කළේය. තම ආධාරකරු අත්අඩංගුවට ගත් පොලිස් නිලධාරීන් තිදෙනා ගැන තමන් බලාගන්නා බව තර්ජනාත්මකව පැවසීය.

එතැනින් නොනැවතී එක් පොලිස් නිලධාරියකුගේ පදිංචිය ත්‍රිකුණාමලයේ බව දැනගෙන නැගෙනහිර ආණ්ඩුකාර සෙන්දිල් තොණ්ඩමන් මහතාට දුරකතනයෙන් කතා කර මේ පොලිස් නිලධාරියා ගැන බලාගන්නා ලෙසට දැනුම් දීමක්ද කළේය.

මේ පොලිස් නිලධාරීන් වහාම මාරු කර යැවිය යුතු බවත් ඉන් එක් අයකු කොටගල තම පක්ෂ මූලස්ථානයේ රාජකාරියට යෙදවිය යුතු බවත් පොලිස් අධිකාරිවරයාට නියෝගයක්ද කළේය. පොලිසියේ ජල සැපයුම අත්හිටුවීමට ක්‍රියා කරන බවටද ඔහු තර්ජනය කර තිබිණි. මේ සිද්ධිය වීඩියෝ කිරීම හෝ ඡායාරූප ගැනීම හෝ නොකළ යුතු බවට නියෝගයක්ද පනවා එය නිරීක්ෂණය කිරීමට තමන්ගේ ආධාරකරුවන් පිරිසක්ද යෙදවීය. 

මෙකී සිදුවීම් පෙළ කෙසේ හෝ වීඩියෝගත කර මාධ්‍යයට මුදා නොහැරියා නම් මේ කතාව අහන කිසිවකුත් එය විශ්වාස කිරීමට පවා මැළිවනු ඇත. රටේ දේශපාලනඥයකුට ප්‍රදේශයේ පොලිසිය තමන්ගේ අතට ගෙන තමන්ට අවශ්‍ය ආකාරයට නීතිය ක්‍රියාත්මක කරවා ගැනීමට හැකි නම් රටේ නීතියක් තිබීමෙන් පලක් නැත. ආණ්ඩුවේ නීතිය ක්‍රියාත්මක කිරීමට පොලීසි තිබීමෙන් තේරුමක්ද නැත. එහෙත් මේ රටේ නීතිය බලයේ සිටින දේශපාලකයන්ට එක් ආකාරයකටත් බලය නැති දේශපාලකයන්ට තවත් ආකාරයකටත් ක්‍රියාත්මක වන බව පොදු පිළිගැනීමය.

මේ කවර තත්ත්වයක් යටතේ වුවද තොණ්ඩමන් අමාත්‍යවරයා සිදුකර ඇත්තේ රටේ සාමාන්‍ය නීතියට පටහැණි ක්‍රියාවකි. බලයේ සිටින දේශපාලකයා සහ පොලිසිය අතර පවතින සමීප සබඳතාත් ඒ ඇසුරින් සිදුවන නීතිය නැවීමත් සම්බන්ධයෙන් අපේ රටට ඇත්තේ අපකීර්තිමත් ඉතිහාසයකි.

මෙහිදී අමාත්‍යවරයාගේ මේ හැසිරීම්වලට හේතු වී තිබුණේ ඔහුගේ ආධාරකරුවකු බැංකු නිලධාරීන් සමඟ ඇතිකරගත් ආරවුලක් හේතුවෙන් ලැබුණු පැමිණිල්ලක් මත අත්අඩංගුවට ගැනීමේ සිද්ධියකි. වාර්තා වූ අන්දමට මේ ආධාරකරු බැංකුවෙන් නීතිවිරෝධී අයුරින් තොරතුරක් දැනගැනීමට උත්සාහ කිරීමේදී බැංකුවෙන් දැක්වූ ප්‍රතිචාරයට උරණ වී කලහකාරී ලෙස හැසිරී තිබේ. තොණ්ඩමන් අමාත්‍යවරයා ඉදිරිපත් වී ඇත්තේ එසේ නීතිය හමුවේ වැරැද්දක් කර ඇති බවට එල්ල වූ චෝදනාවකට අත්අඩංගුවට ගත් මේ සැකකරු බේරාගැනීමටය.

සැකකරුවකු තමන්ගේ ආධාරකරුවකු නම් ඔහුට එරෙහිව නීතිය ක්‍රියාත්මක නොකරන ලෙසට දේශපාලකයන් පොලිසියට දැනුම් දීම මේ රටේ සාමාන්‍ය තත්ත්වයකි. එහෙත් තොණ්ඩමන් අමාත්‍යවරයා මෙන් මහජනතාව ඉදිරියේ පොලීසියේ රෙදි ගලවන දේශපාලකයන් නම් ඉතා විරලය.

අඩුම තරමින් මෙහෙම වැඩක් හතර අතේ මඩ ගාගන්නේ නැතුව කර ගන්නා හැටි ජ්‍යෙෂ්ඨ දේශපාලඥනයකුගෙන් අසා දැනගෙන සිටියා නම් තොණ්ඩමන් මහතාට මේ අවනඩුවෙන් ගැලවී තමන්ගේ ජාම බේරාගෙන කටයුතු කිරීමට ඉඩ තිබිණි. දැන් සිදුවී ඇත්තේ තමන්ගේ ආධාරකරුවන් ඉදිරියේ වීරයකු වූ තොණ්ඩමන් අමාත්‍යවරයා රට ඉදිරියේ දුෂ්ටයකු බවට පත්වීමය.

(***)