(චමින්ද වැවතැන්න)

මත් පෙති 173 ක් සමග අත් අඩංගුවට ගත් කෑගල්ල මහ රෝහලේ කණිෂ්ඨ සෞඛ්‍ය කාර්ය සහයිකාව හෙට 14 වැනිදා දක්වා රිමාන්ඩ් බන්ධනාගාර ගත කරන ලෙස කෑගල්ල මහේස්ත්‍රාත් වාසනා නවරත්න මහත්මිය  නියෝග කළාය.

මෙලෙස රක්ෂිත බන්ධනාගාර ගත කරනු ලැබුවේ කෑගල්ල පරගම්මන නාමල් උයනේ පදිංචිව සිටින මොරගහකන්ද රාළලාගේ කුසුමාවති නැමැති 58 හැවිරිදි සිව් දරු මවකි.

රක්ෂිත බන්ධනාගාර ගත කර ඇති කණිෂ්ඨ සෞඛ්‍ය සහයිකාව කාලයක සිට මත් පෙති කෑගල්ල රෝහලේ සිට අලෙවි කරන බවට අවස්ථා ගණනාවක දී බුද්ධි අංශ වෙත තොරතුරු ලැබී ඇති බව පොලිසිය පැවසීය.

පොලිස් නිලධාරියෙකු උපාය දූතයකු ලෙස පෙනී සිට වාට්ටුවේ රාජකාරී කටයුතු සිදු කරන අවස්ථාවේ දී වාට්ටුවට ගොස් රුපියල් 2000 ක මුදලක් දී වර්ග තුනකින් මත් පෙති 40 ක් උපාය දූත පොලිස් නිලධාරියාට අලෙවි කරන අවස්ථාවේ දී සෞඛ්‍ය කාර්ය සහයිකාව පොලිස් කණ්ඩායමක් විසින් අත් අඩංගුවට ගන්නා ලදි.

පසුව ඇය සේවය කරන වාට්ටුවේ කබඩි එකක් ද පොලිස් නිලධාරින් විසින් පරීක්ෂා කරන අවස්ථාවේ දී තවත් මත් පෙති 133 ක් සගවා තිබී හමු වු බව පොලිසිය පැවසීය.

අත් අඩංගුවට ගත් සැකකාරියගෙන් අද ප්‍රකාශ සටහන් කරගෙන කෑගල්ල මහේස්ත්‍රාත් අධිකරණයට ඉදිරිපත් කර තිබුණි. එහිදී සැකකාරිය හෙට 14 වැනිදා දක්වා රක්ෂිත බන්ධනාගාර ගත කරන ලෙස මහේස්ත්‍රාත්වරිය නියෝග කළාය.