(බිමල් ශ්‍යාමන් ජයසිංහ  සහ රේඛා තරංගනී ෆොන්සේකා)

පාසල් භූමියේ මිතුරන් පිරිසක් සමඟ ඔන්චිල්ලාවක් පදිමින් සිටි 14 හැවිරිදි සිසුවෙකු අද පෙරවරුවේ  එයින් බිමට වැටී මියගොස් ඇතැයි  මොරටුමුල්ල පොලිසිය කියයි.

මෙලෙස අවාසනාවන්ත ලෙස මියගොස් ඇත්තේ ,මොරටුව පහළ ඉඳිබැද්ද ප්‍රදේශයේ පදිංචි මොරටුමුල්ල විල්ලෝරාවත්ත ඥානිස්සර බෞද්ධ විද්‍යාලයේ නවය වසරේ ඉගෙනුම ලබමින් සිටි ජයවර්ධනගේ චමෝද් දුලන්ජය විජේසේකර  නැමැති සිසුවෙකි.

විද්‍යාලයේ පසෙකට වන්නට සවිකර තිබෙන  සිව් දෙනෙකුට විනෝද විය හැකි ආකාරයෙන් යකඩයෙන් සහ තහඩුවලින් තනන ලද ඔන්චිල්ලාව වෙත  සිසුන් පස් දෙනෙකුට වැඩි පිරිසක් ගොඩවී ඔන්චිලි පදිමින් සිටියදී මියගිය සිසුවා ද ඔන්චිල්ලාවට පිටතින් නැඟ අනෙකුත් සිසුන් හේත්තු වි සිටින කොටසේ හිඳගෙන එම ඔංචිල්ලාව පදිමින් සිටියදී  අවාසනාවන්ත අනතුර සිදුවී ඇතැයි පොලිසිය කියයි

වේගයෙන් ඔන්චිල්ලාව ඒ මේ අත පැදවීමේදී  ඔන්චිල්ලාවේ පිටතින් නැග සිටි සිසුවා එකවරම ඔන්චිල්ලාව අසලම වැටී ඇති අතර ඒ සමඟම ඉහළට එසවී එසවී තිබූ ඔන්චිල්ලාව ආපස්සට ඒමේ දී එහි යට යකඩ තහඩු කොටස  සිසුවා ගේ හිසෙහි ගැටී එය පොළවට තද වීමෙන්  අනතුරුව ඔහු  බරපතළ තුවාල ලබා ඇතැයි පොලිස් විමර්ශනවලදී හෙළිවී ඇත.

සිසුවාගේ නාසයෙන් හා මුඛයෙන් අධික ලෙස ලේ වහනය වී ඇති අතර ඒ සමගම ඔහු මොරටුව ලුනාව ප්‍රාදේශීය රෝහල වෙත ඇතුලත් කර ඇති අතර මද වේලාවක දී සිසුවා මියගොස් තිබූ බව පොලිසිය කියයි.

සිසුවා ගේ මරණය සම්බන්ධයෙන් මහේස්ත්‍රාත් පරීක්ෂණයක් පැවැත්වීමට නියමිතය.

මොරටුමුල්ල පොලිසියේ   ස්ථානාධිපති පොලිස් පරීක්ෂක දිනේශ්  චන්ද්‍රසිරි මහතාගේ උපදෙස් මත  පොලිස් කොස්තාපල් 60685 නිශාන්ත මහතා පරීක්ෂණ පවත්වයි.