(හර්ෂණ තුෂාර සිල්වා) 
 
වැරැදීම් සිදුවිය හැකි නමුත් සැඟවීමට කිසිවක් නැතැයි ද යහපාලන ආණ්ඩුව අඛණ්ඩව ඉදිරියට යන්නේ යැයි ද අග්‍රාමාත්‍ය රනිල් වික්‍රමසිංහ මහතා අද (20) පැවැසීය.
 
භාණ්ඩාගාර බැඳුම්කර නිකුතුව සම්බන්ධයෙන් පත් කර තිබෙන ජනාධිපති විමර්ශන කොමිෂන් සභාව ඉදිරියේදී පැහැදිලි කිරීම් සිදු කිරීමෙන් අනතුරුව මාධ්‍ය අමතමින් අග්‍රාමාත්‍ය රනිල් වික්‍රමසිංහ මහතා ඒ බව ප්‍රකාශ කළේය. 
 
එහිදි තවදුරටත් අදහස් දැක්වූ අග්‍රාමාත්‍ය රනිල් වික්‍රමසිංහ මහතා මෙසේ ද කීය. 
 
“වැරදීම් වෙන්න පුළුවන්. අපි වැරැදි හදාගෙන ඉදිරියට යනවා. යහපාලන ආණ්ඩුව තවදුරටත් ඉදිරියට යනවා. මට අද ගොඩක් කරුණු සම්බන්ධයෙන් විස්තර ඉදිරිපත් කරන්න අවස්ථාව ලැබුණා. ආර්ථික ප්‍රතිපත්තිය, රටේ ණය බර, රටේ පැවැතුණු ආර්ථික අර්බුදය, ආර්ථිකයට සිදුව තිබූ හානිය ආදී බොහෝ දේ සම්බන්ධයෙන් කරුණු පැහැදිලි කරන්නට මට අවස්ථාවක් ලැබුණා. මේ අවස්ථාව ලබාදීම සම්බන්ධයෙන් මා කොමිසමේ සභාපතිවරයාට ස්තූතිවන්නත වෙනවා. 
 
අපේ යහපාලන ආණ්ඩුව දිගටම යනවා. අපිට සඟවන්න දෙයක් නැහැ. ඒ අවස්ථාවේදී ගත යුතුව තිබූ නිවැරැදිම හා හොඳම තීන්දුවක් රටේ ආර්ථිකය වෙනුවෙන් ගත්තා. කඩා වැටී තිබූ ආර්ථිකය යළි ගොඩනැංවීමේ වගකීම අපි බාරගත්තා. අපි එම වගකීම නොපිරිහෙළා ඉටු කරනවා” යැයි ද අග්‍රාමාත්‍යවරයා වැඩිදුරටත් කීය. 
 
කබීර් හෂීම්, සජිත් ප්‍රේමදාස, මලික් සමරවික්‍රම, සාගල රත්නායක, මංගල සමරවීර, ඩී.එම් ස්වාමිනාදන්, අර්ජුන රණතුංග, රාජිත සේනාරත්න, සරත් ෆොන්සේකා, වජිර අබේවර්ධන, ගයන්ත කරුණාතිලක, තිලක් මාරපන, අකිල විරාජ් කාරියවසම්, නවීන් දිසානායක, දයා ගමගේ, ගාමිණි ජයවික්‍රම පෙරේරා, ජෝන් අමරතුංග, පී හැරිසන්, චන්ද්‍රානී බණ්ඩාර යන අමාත්‍යවරුන්, මනෝ ගනේෂන්, රුවන් විජයවර්ධන, ඉරාන් වික්‍රමරත්න යන රාජ්‍ය අමාත්‍යවරුන්, තාරක හේමකුමාර, වෛද්‍ය කාවින්ද ජයවර්ධන, මුජිබර් රහුමාන් යන පාර්ලිමේන්තු මන්ත්‍රීවරුන් රැසක් කොමිසමට පැමිණි අතර කොමිසම පිටතත් එක්සත් ජාතික පක්ෂ නියෝජිත විශාල පිරිසක් අග්‍රාමාත්‍යවරයාට සහාය දැක්වීම සඳහා පැමිණ සිටියහ.