කරන්දෙණිය - එම්. සුසිල් ප්‍රියන්ත 

සිය ආයතනයෙන් ගිය විනෝද චාරිකාවේදී වියදම් වූ මුදල් පියවීමට සභාපතිවරයාගෙන් ලැබුණු අමුතුම බිල්පතක් නිසා දැන් අලි අමාරුවක වැටුණු ආයතනයක සේවකයින් පිරිසක් පිළිබඳව අපූරු කතාවක් දකුණු පළාතේ නගරයකින් අසන්නට ලැබේ.
මේ සභාපතිවරයා අති දක්ෂ වැඩකරුවෙකි. කයිය නායකයෙකි. තමන්ට කළ නොහැක්කක් නැතැයි සේවකයින්ට පෙන්වීමට උත්සහ දැරූ අයකු ලෙසට ද ප්‍රසිද්ධය. නිවසත්, ආයතනයත් සමබරව ගෙන යාමට දැරූවේ අවංක උත්සාහයකි. තමන්ට මෙන්ම ආයතනයට ද දෙයක් කරගන්නට උත්සාහ දැරුවේ හේතු දෙකක් නිසාය. වැඩක් නොකළහොත් සිය තනතුර අහිමි වනු ඇතැයි ඇති වූ සාධාරණ සැකය එක හේතුවකි. වැඩෙන් සාක්කුවට වැටෙන මොනරුන් ගණන අනෙක් හේතුවය.
සිය ආයතනයෙන් කෙරෙන විශේෂ කටයුතුවලදී භාර්යාව ඇතුළු පවුලේ අය ද එයට සහභාගි කරවා ගැනීමට ඔහු සෑම විටම උත්සාහ ගත්තේය.
ආයතනයේ සේවක, සේවිකාවන් සඳහා විනෝද චාරිකාවක් ඔහු සංවිධාන කරන්නේ මේ අතරේදීය. මේ සඳහා ඔහු භාර්යාව ඇතුළු පිරිස ද සහභාගි කරවාගත්තේය. සේවකයන්ට එය ප්‍රශ්නයක් නොවීය. රුපියල් ලක්ෂ දහයකට ආසන්න පිරිවැයක් ඒ වෙනුවෙන් වැය කිරීමට තරම් ඔහු සද්ගුණවත් විය. සේවකයෝ මේ විනෝද ගමනින් සතුටු වූහ. සේවකයන්ට එම ගමනේදී ඇති තරම් පහසුකම් සැපයීමට සභාපතිතෙමේ කටයුතු කළේය. ඒ, තමන්ගේ සාක්කුවෙන් නොව ආයතනයේ මුදලින්ය.

විනෝද චාරිකාව නිමා විය. සභාපතිතුමා විනෝද චාරිකාවේදී තමන්ට සැලකූ ආකාරය පිළිබඳව සේවකයෝ මහත් උජාරුවෙන් කතා කළහ. මෙවැනි සභාපතිවරයෙක් සිය ආයතනයට පත්වුණේ තමන්ගේ වාසනාවට යයි ඔවුහු කීහ. ඔවුහු සිතූහ. මෙවැනි වෙස්සන්තර කෙනෙකු වගේ සභාපතිවරයකු යටතේ සේවය කිරීමට ලැබීමත් තමන්ගේ පෙර පිනක් බව ද ඔවුහු කීහ. සිතූහ.
කාලය කෙමෙන් ගෙවී ගියේය. පැවැති නිලවරණයෙන් වෙස්සන්තර සභාපතිට ගෙදර යන්න සිදු වූවේය. මේ ආයතනයට අලු‍තින් ආ සභාපතිවරයාට වෙස්සන්තර සභාපතිවරයාගේ විනෝද චාරිකාව පිළිබඳව දැනගන්නට ලැබුණේය. ඒ නිසාම ඔහු ඒ වෙනුවෙන් වියදම් කරන ලද රුපියල් ලක්ෂ දහයකට ආසන්න වියදම් විස්තරය පිළිබඳ ලිපි ගොනුව පරීක්ෂා කළේය. එහිදී රුපියල් අටදහසකට ආසන්න අමුතුම බිල්පතක් අලු‍ත් සභාපතිවරයාගේ ඇසේ වැදුණේය. ඔහුගේ දෙඇස් උඩ ගියේය. නළල රැලි ගැසුණේය. තොල කට වේළු‍ණේය.
එම විනෝද චාරිකාවට එක්වූ වෙස්සන්තර සභාපතිවරයා සහ ඔහුගේ භාර්යාවගේ පෞද්ගලික සනීපාරක්ෂාව වෙනුවෙන් මිලදීගත් දත් බුරුසු, දත් බෙහෙත්, ඇතුළු දෑ අඩංගු බිල්පතක් එහි තිබුණේය. සභාපතිවරයා වෙස්සන්තර බැවින් ඔහු විනෝද චාරිකාවේදී තමන්ට දුන් සැප ගැන මේ කිසිත් නොදත් මේ ආයතනයේ සේවක, සේවිකාවන් සිටිනුයේ ඒවා මෙනෙහි කරමින්ලු‍.