කලවාන - උපේන්ද්‍ර ප්‍රියංකර ජාතුංගම

බිරිඳගේ කැන්වසින් යාම නවත්වන්න සැමියා විසින් දෙන ලද බඩ විරේක සැමියාටම පෙවූ බිරිඳක පිළිබඳ පුවතක් බස්නාහිර පළාතේ එක්තරා ගමකින් අසන්නට ලැබුණි.ඔවුහු සැමියා, බිරිඳ ලෙස ජීවත් වුව ද, දේශපාලන මත අතින් පරස්පරව කටයුතු කරති. බිරිඳ එක් දේශපාලන පක්ෂයක අපේක්ෂකයකුට සහයෝගය දක්වන අතර, සැමියා ඔහුගේ අපේක්ෂකයා වෙනුවෙන් සහයෝගය දක්වයි.දේශපාලන කාලවකවානුව තුළ ඔවුන් නයි මුගටි ලෙස කටයුතු කරන අතර, එය කොතරම් ද කිවහොත්, සැමියා කඩෙන් කන තරමට උග්‍රය. ඔවුන් විවාහ වී සිටිය ද දරුවන් නොමැති අතර, මවුපියන් විසින් සොයා දුන් යෝජිත විවාහයක් සිදු කරගෙන ඔවුහු ජීවිතය ගත කරති. 

දෙපාර්ශ්වයේ මවුපියන් සිය දරුවන්ගේ හඳහනේ ග්‍රහයන් ගැළපුව ද, ඔවුන්ට අමතක වූ කාරණය වූයේ, මොවුන්ගේ අපේක්ෂකයන් ගළපා ගැනීමටය. කෙසේ වෙතත්, මෙම ගැටුම තිබෙන්නේ මැතිවරණය අවසන් වන තුරු පමණකි. 
මැතිවරණය අවසන් වූ පසුව දෙදෙනා චිත්‍රපටයක් නරඹා විනෝද ගමනක් ගොසින් යහපත් සාමකාමී ලෙස පවුල් ජීවිතය ගත කරති.
මේ අතර, මේ මැතිවරණ සමයේ බිරිඳගේ කැන්වසින් ගමන නවත්වන්න ඇය රැගෙන යන වතුර බෝතලය වෙත බඩ විරේක දැමීමට සැමියා කටයුතු කර ඇත. මේ බව දුටු ඔහුගේ බිරිඳ ඔහු එතැනින් ඉවත්ව යන තුරු බලා සිට එම වතුර ඔහුගේ සෝඩා බෝතලය වෙත දමා අලු‍ත් වතුර බෝතලයක් පුරවාගෙන කැන්වසින් ගොස් ඇත.
මේ අතර, සුපුරුදු පරිදි කැන්වසින් යාමට පෙර ෂොට් එකක් දමා යාමට පුරුදු වී සිටි ඔහු බඩ විරේක කලවම් සෝඩා සමග මත්පැන් පානය කර ඇත. කැන්වසින් ගමන් පටන්ගෙන ටික වෙලාවකින් ඔහුට දෙවියන් සිහිව ඇත්තේ තම බඩ තුළ ගොර ගොර හඬත් සමග බඩ අවුල් වන විටය. තම බිරිඳට දුන් බඩ විරේක තමන්ට පෙවුණේ කෙසේ ද යැයි ඔහු අමාරු පිටම සිහිපත් කර ඇත්තේ සිතින් සාප කරමිනි. 
අමාරු පිට සිය අපේක්ෂකයා වෙනුවෙන් කැන්වසින් ගිය ඔහු ස්ටේෂමෙන් ස්ටේෂමට නවත්වන කෝච්චියක් මෙන් කැන්වසින් යන නිවෙසින් නිවෙසේ වැසිකිළිවල නතර වෙමින් කාලය ගත කරමින් කැන්වසින් කටයුතු සිදු කර ඇත. ඔහුගේ මිතුරන් මේ බව විමසද්දී, ඔහු බිරිඳට ඇටවූ උගුල ලැජ්ජාවට නොපවසා, පරණ රොටිවලින් සෑදූ කොත්තු කෑමෙන් මෙම තත්වය උදා වූ බව කියා ඇත. 
ඔහු විරුද්ධ පක්ෂ අපේක්ෂකයන්ගේ ආධාරකරුවන්ගේ නිවෙස්වලට වැසිකිළි යාම පිළිබඳව පිරිස විමසද්දී ඔහු පවසා ඇත්තේ, “බඩේ අමාරුවට මොන පක්ෂ ද?” කියාය.