හසලක සුනිල් ඒකනායක

වසරකට අධික කාලයක් අසල්වැසි කාන්තාවක සමඟ ඉතා හොර රහසේ පවත්වාගෙන ආ බව කියන සැමියාගේ අනියම් පෙමක් බැංකු කාඩ් පතකින් බිරියට අනාවරණය වූ සිදුවීමක් හසලක පොලිස් වසමේ ගම්මානයකින් වාර්තා විය.
32 හැවිරිදි ඔහු දෙදරු පියකු වන අතර ප‍්‍රදේශයේ පෞද්ගලික ආයතනයක සේවය කරන අයෙකි. බිරිය ගෘහණියකි. ඇය නිවෙසේ කටයුතු හා දරුවන්ගේ එදිනෙදා කටයුතු බලා කියා ගනිමින් නිවෙසේ පසුවේ. වසරක පමණ කාලයක සිට මොහුගේ අනියම් පෙමක් ගැන තොරතුරක් බිරියගේ කනට වැටී තිබුණත් එය තහවුරු කර ගැනීමට සාක්ෂියක් නොවූයෙන් ඇය නිහඬව ම සිටියාය. 
මෙදින සෙනසුරාදා දිනකි. සැමියා පෙරදින මෙන් පෙරවරුවේ සූදානම්ව රැකියාවට පිටත්ව ගිය අතර ඇය ද පෙර පරිදි නිවෙසේ කටයුතුවල නිරතවූවාය. දහවල් 10ට පමණ අසල්වැසි නිවෙසක අවුරුදු 10ක පමණ කුඩා දරුවකු එම නිවෙසට පැමිණ “ඇන්ටි අන්කල් ගෙදර ඉන්නවාද?” කියා විමසා ඇත. එහිදී “මාමා වැඩට ගියා, ඇයි පුතේ මාමා හොයන්නේ? යැයි ඇය දරුවාගෙන් විමසා තිබේ. “අද උදේ අන්කල් අපේ ගෙදර ආවා. අන්කල් ගියාට පස්සේ මම අපේ නිදන කාමරේ ඇඳ අස්කරන කොට අන්කල්ගේ මේ කාඩ් එක ඇඳේ වැටිලා තිබිලා මට හම්බ වුණා මම මේක අම්මටවත් නොදි මාමාටම දෙන්න කියලා මේ අරගෙන ආවේ.” යැයි කියා ඔහු අත තිබූ කාඩ්පතක් ඇය අත තබා “ඇන්ටි මම යනවා.” යැයි කියමින් දරුවා ඔවුන්ගේ නිවෙස බලා දිවගියේය.

දරුවා නිවෙසින් ගිය පසු ඇය කාඩ්පත පරික්ෂා කිරීමේ දී එය තම සැමියාගේ බව දැන ඇයට සැමියා පිළිබඳව දැණුන පිළිකුලත්        සමඟ දැඩි වේදනාව පිට කෙරුණේ ඉකිබිඳුමකිනි. මවගේ ඉකිබිඳුම ඇසි දුව ආ දරුවන් දෙදෙනා මව මෙසේ හඬන්නේ ඇයිද කියා විමසූ විට ඇය පැවසුවේ ”පුතේ අපි දැන්ම අපේ අත්තම්මලාගේ ගෙදර යන්න ඕන, ලෑස්ති වෙන්න ඉක්මනින්.” යැයි පැවැසුවාය.
 ඇයද කඩිමුඩියේ ලකලෑස්ති වූයේ සැමියාගේ අනියම් පෙම බැංකු කාඩ් පතින් හමුවූ සිදුවීමත් සඳහන් කර ඔහුට අනියම් බිරිය සමඟම මින් ඉදිරියට ජිවත් වෙන්න යැයිද මින් මතුව තමන් හෝ දරුවන් දෙදෙනා මේ නිවසට නොපැමිණෙන බවත් මහගෙදර පැත්ත පළාතේ නොඑන ලෙසත් කිසිදු අයුරකින් දුරකතනය ඔස්සේ තමන්ට හෝ දරුවන්ට කතා නොකරන ලෙසත් මේ සම්බන්ධයෙන් තමන් ඉදිරියේදි අධිකරණ ක්‍රියා මාර්ගයක් ගැනීමට බලාපොරොත්තු වන බවත් දන්වා ලිපියක්ද ලියා කාමරයේ මේසය මත පෙට් කාඩ්පත අසලින් තබා ඇය දරුවන් සමඟ මහ ගෙදරට පිටත්ව ගියේ අසල්වැසි තම හිතවතියකට ද මේ පුවත පවසමිනි.
එම කාඩ් සිදුවීම ගම පුරා පැතිර ගියේ විදුලි වේගයෙනි. මෙය කන වැටුණු ඔහුටද ගමේ විසීමට නොහැකි වූයේ අනියම් බිරියගේ සැමියාගේ කනට ද මේ පුවත සැලව තිබීම නිසා බිරියට වඩා ඔහුගෙන් කම්මුල් පාරක් කෑමට සිදුවන බවත් ගමේ කොල්ලන් “ආ කාඩ් මාමේ” “අයියේ ” යැයි කියමින් ඔහුට මග තොටේදි ඔච්චම් කරන නිසාවෙනි. කාඩ් පලහිලව්ව නිසා ඔහු ගමෙන් පිටව ගොස් වෙනත් ප‍්‍රදේශයක කුලී නිවහනක තනිවම වාසය කරන බවද ගමේ තැන තැන කතාවන මාතෘකාවක් බවට මේ වන විට පත්වී ඇත.