දෙදරු මවගේ නිවසේ දොර  අසම්මත ආකාරයට  විවෘත කරවා ගෙන  සම්මත නිවසේ දොර සදහටම වසා ගත් හාදයෙක් පිළිබඳව අපූරු කතාවක් ගාලු‍ දිසාවේ ගමකින් අසන්නට ලැබේ.
මිනිහා හීන් නූල් කාරයෙකි. තිදරු පියෙකි. හීන් නූලෙම එක පවුලක් නැත්තටම නැති කළේය. මිනිහා අලු‍ත්ම තාලයේ හීන් නූලක් දැන් අඹරමින් සිටී. ඒ දෙදරු මවක සමගය. ඇයගේ නිවස තිබෙනුයේ දුරකය. මෙය ඔහුට වාසියටම සිටියේය.
  රාජකාරියට එනවා යයි කියමින් සෑම දිනකම ප්‍රධාන නගරයට ආවත් ඔහු රිංගන්නේ මේ නිවස තුළටය. ඒ යතුරු පැදියෙනි. තමාගේ භාර්යාව සිය යතුරු පැදියේ නංවාගෙන නොගියත් දුර අම්මන්ඩී දාගෙන නගරය පුරාම යනුයේ දකින හිතවතුන්ගේ සිතට අපිරියාවක් එක් කරමිනි. මේ නිසාම නිවසේ සිටින මොහුගේ භාර්යාව දැනුවත් කිරීමට ඇතැම්හු කටයුතු කළහ.
මේ කිසිදෙයක් නොදත් ඔහුගේ භාර්යාව මුලදි මුලදී ඇතැමුන්ගේ මේ සන්නිවේදනය නොපිළිගත්තාය. කාලයත් එක්ක සිය සැමියාගේ හැසිරීම් රටාවේ වෙනසක් දුටු භාර්යාවට අකමැත්තෙන් හෝ සිය සැමියා ගැන සැක සාංකාව මතුවෙමින් තිබුණේය.

ලැබු නිශ්චිත තොරතුරකට අනුව ඇය අර අම්මන්ඩිගේ නිවසට දහවල් ගියාය. නිවසේ දොර වසා තිබුණත් සිය සැමියාගේ යතුරු පැදිය ඇයගේ මිදුලේය. භාර්යාවට හීන් දහඩිය දැමීය. මේ නිවස ඇතුළේ සිදුවෙන දේ ගැන ඇයට අමුතුවෙන් සිතන්නට දෙයක් නොවීය.
දැන් සියල්ල සක්සුදක්සේ පැහැදිලිය. ඇය කේන්තියෙන් පිච්චි පිච්චී සිටියාය. මේ තිරිසනුන්ට ආත්මයක් නැතිවුණාට තමන්ට ආත්මයක් ඇතැයි සිතූ ඇය කලබල නොකර තමාගේ අත් බෑගයෙක් කොළයක් හා පෑනක් ගෙන අපූරු වදන් පෙළක් ලියා ඔහුගේ යතුරු පැදියේ ෂීට් එකේ ගලකට යටකර තබා ආවාය.
සියල්ල නිමවූ පසු ඔහු එම නිවසින් පිටව යතුරු පැදියට ළඟට පැමිණියේ සිය නිවසට යාමටය. ‘තමුසේ ආයේ ගෙදර නාවට කමක් නැහැ. ඔහේම ඉන්නවා’’ යයි ලියූ කඩදාසියක් දුටු ඔහුට තුන් මුහුණින් දහඩිය දැමීය. දැන්වීම ලියා ඇත්තේ කවුද යන්න හොඳටම දැනගත් ඔහුට සිය නිවස කරා යාමට ධෛර්යක් නොවීය.
භාර්යාව සහ දියණියන් දෙදෙනා සහ පුතුගෙන් කොසු ඉදල් පහර කන්න වන බව දැනගත් ඔහු දැන් මේ නිවසේම බින්න බැහැලාලු‍.

කරන්දෙණිය එම්. සුසිල් පියන්ත