( තිළිණි ද සිල්වා )

ඉන්දියාව හා ශ්‍රී ලංකාව අතර ආරම්භ කිරීමට යෝජිත සංචාරක ගුවන් බුබුළ අත් හිටුවා නැතැයි සංචාරක ඇමති ප්‍රසන්න රණතුංග මහතා අවධාරණය කරයි.

කෙසේ වෙතත් ඉන්දියාවේ මේ දිනවල පවතින කොවිඩ් තත්ත්වය සලකමින් ලබන 26 වැනිදා සිදු කිරීමට නියමිතව තිබූ කුෂිනගර් -  කටුනායක ගුවන් ගමන තාවකාලිකව කල් දැමිමට තීරණය කළ බව ද සංචාරක ඇමතිවරයා කියා සිටියේය

 ජාත්‍යන්තර ගුවන් තොටුපළක් ලෙස නවීකරණය කරන ලද ඉන්දියාවේ උත්තර් ප්‍රදේශ  ප්‍රාන්තයට අයත් කුෂී නගර් තොටුපළට පළමු ජාත්‍යන්තර ගුවන් යානයක් ගොඩබැස්සවීම සදහා ඉන්දීය අග්‍රාමාත්‍යවරයා විසින් ශ්‍රී ලංකාවට කරන ආරාධනයකට අනුව මෙම ගුවන් ගමන සංවිධානය කළ බව සංචාරක අමාත්‍යාංශය කියා සිටී..  

ඉන්දියාවත් ශ්‍රී ලංකාවත් අතර ආගමික සබදතා වැඩි දියුණු කර මෙරට බැතිමතුන්ට බෞද්ධ සිද්ධස්ථාන වැද පුදා ගැනීමට හැකිවන පරිසරයක් නැවත නිර්මාණය කිරීම එම ගුවන් ගමනේ අරමුණ බවද එම අමාත්‍යාංශය පෙන්වා දේ.

කෙසේ වෙතත් ශ්‍රී ලංකාව හා ඉන්දියාව අතර සංචාරක ගුවන් බුබුළ ක්‍රියාත්මක කිරීමට තීරණය කරනු ලැබුවේ  දෙරට අතර සංචාරක ව්‍යාපාරය නංවාලීම සදහාය.

දෙරට අතර සංචාරක ව්‍යාපාරය නංවාලීමේ අරමුණින් ,සංචාරක ගුවන් බුබුළ යටතේ දෙරට අතර නැවත ගුවන් මෙහෙයුම් ආරම්භ කිරීම එහි අපේක්ෂා කරන බව ඇමතිවරයා වැඩිදුරටත් කීය.