කුකුළා හැඬලීමටත් පෙර අවදි වී බත්මුල් ඔතා වතුර බෝතල් පුරවා තබා අවදිකරගත් පුංචි දරුවන් ශිෂ්‍යත්ව අමතර පන්තිවලට කැඳවාගෙන ගියේ කෙසේ හෝ ලොකු ඉස්කෝලයක් ලබා ගැනීමේ නම්බුව තමන්ට ද හිමිකර ගැනීමේ ආශාවෙන් සිටි මව්වරුන් පිරිසකි.

ලහි ලහියේ උදේ අවදි වී තම දරුවන් සූදානම් කරගත් ඔවුහු උදේ හතරේ සිට අමතර පන්තිවලට දරුවන් රැගෙන ගියහ.

මේ අපේ මහත්තයට යාළුවෙක් හොඳ ප‍්‍රශ්න පත‍්‍ර සෙට් එකක් දීලා ඒ ”සර්” තමයිලූ ගිය සැරේ වැඩිම ලකුණු ගත්තු ළමයින්ට උගන්වලා තියෙන්නේ.

එවැනි උදාර වදන් කියමින් අගය කළ තැනැත්තියක් දිනක් අමතර පන්තියක ගේට්ටුවක් අසලදී ප‍්‍රශ්න පත‍්‍ර කට්ටලයක් අනෙක් මව්වරුන්ට පෙන්වීය.

එසේ කියූ සැණින් එක් කාන්තාවක් වහා ක‍්‍රියාත්මක වී හරි හරි අනේ මේවා ෆොටෝ කොපි කරල අපේ ළමයි දෙන්නා තුන්දෙනාට දෙමු.

එසේගත් තීරණයකට පසුදිනම ප‍්‍රශ්න පත‍්‍ර කට්ටල කිහිපයක් ලහි ලහියේ එක් කාන්තාවකගේ වියදමින් ඡායාපිටපත් කොට රහසේ තම දරුවන් අතර බෙදා ගත්තේය.

එදින නිවෙසට ගොඩ වූ සැණින්ම දරුවන් මේස මතට ගාල්කොට රහසේ පිටපත් කරගත් ප‍්‍රශ්න පත‍්‍රයට පිළිතුරු ලිවීමට දරුවන් යොමු කළේය.
සෙල්ලම්කරන වයසේ සිරකරුවන් වූ දරු පිරිසද ඇඟ හිරි අරිමින් පෑන් අගිසි විකමින් මව්වරුන්ගේ අණසකට ප‍්‍රශ්න පත‍්‍රවලට පිළිතුරු ලිවීම ආරම්භ කළහ.
ටික වේලාවක් ගතවිය. අම්මේ මොකක්ද අම්මේ එක ප‍්‍රශ්න පත‍්‍රයක උත්තර සේරම පුරවලානේ......

ප‍්‍රශ්න පත‍්‍රයට ලිවීමට විධානය දී මුළුතැන්ගෙයි කටයුත්තක නිරතව සිටි එක් මවක් අමතා දරුවකු එසේ අසද්දී ආ.... ඒවා අතහැරල අනෙක් ඒවා ලියන්නකෝ.... ඇය හොද්ද හැඳිගාන ගමන් එසේ කීවාය.

අම්මේ විවාහක අවිවාහක බව කියන්නේ මොකක්ද? ඒ කියන්නේ කසාද බැඳලද නැද්ද කියන එකනේ.....

තවත් ටික වේලාව්ක් ගත විය.

අම්මේ සාක්ෂිකරුවෝ කියන්නේ කවුද එවිට මව මදක් කලබලයට පත්වූවාය. මොනවා  ඕවාත් ඔය ප‍්‍රශ්න පත‍්‍රයේ තියෙනවාද ඔව් ඔව් අම්මේ ඒකනේ මම කිව්වේ මේක උත්තර ලියපු ප‍්‍රශ්න පත‍්‍රයක් කියලා.

ඇති වූ සැකය දුරුකර ගැනීමට ඇය පුතුගේ ප‍්‍රශ්න පත‍්‍රයට එබී බැලීමට සිතුවාය.

ජංජාලයයි!

ප‍්‍රශ්න පත‍්‍රය සමග කාගේදෝ විවාහ මංගල සහතිකයකුත් අමුණා තිබුණි.

එය ඡුායා පිටපතකි. සිදුවී ඇති කරුණු සැණින් වටහාගත් ඇය වහා මව්වරුන් කිහිප දෙනෙකුට දුරකථන ඇමැතුම් ලබා ගත්තාය.
ඒ සියල්ලන්ටද විවාහ මංගල සහතිකය ඡායා පිටපතක්ද ප‍්‍රශ්න පත‍්‍ර කට්ටලය සමඟ ලැබී තිබුණි.

ප‍්‍රශ්න පත‍්‍ර ඡායා පිටපත් කළ ස්ථානයේ සේවකයකු වෙනත් අයකුගේ ඡුායා පිටපතක් ද මේ සමග අමුණා තිබීම එයට හේතුව වී තිබුණි.