රාත‍්‍රී කාලයේ නිවසකට ඇතුළු වී ජංගම දුරකතනයක් සොරා ගෙන යමින් සිටියදී අතර මගදී එම දුරකථනයට ආ ඇමතුමක් නිසා දුරකතනය අතහැර පළා ගිය බල්ලකු ගැන පුවතක් සාලියවැව නීලබැම්ම ජනපදයෙන් වාර්තා වෙයි. 

මෙම ජංගම දුරකතනයේ හිමිකරු ප‍්‍රදේශයේ ගොවි මහතෙකි. ඔහුම පවසන අන්දමට දිය නෑම සඳහා සිය ගෙවත්තේ ළිඳට ගොස් සිට ඇත. එවිට දුරකතනය තිබී ඇත්තේ නිවසේ සාලයේ පුටුවක් මතය. දිය නා ආපසු නිවසට පැමිණි ගොවි මහතාට තම දුරකතනය පුටුව මත නැති බව පෙනී ගොස් ඇත. ඒ ගැන වටපිට විපරම් කළද පළක් නොවූ තැන ගෙතුළ සිටි බිරිය හා දරුවන්ගෙන් ද දුරකතනය ගැන විමසීමක් කර ඇත. නමුත් ඔවුන් ද ඒ ගැන දැන සිට නැත. 

තම පවුලටම ඇති එකම දුරකතනය හිටි හැටියේ මෙසේ අතුරුදන්වීම පිළිබඳව කලබල වූ නිවැසියන් තවදුරටත් ඒ මේ අතට ඇවිදිමින් දුරකතනය සොයන අතරේ නිවසට ඉදිරියෙන් ඇති අතුරු පාරක් දෙසින් දුරකතනයක් නාදවෙන හඬ ඇසී ඇත. නාදයට අනුව එය තමාගේ දුරකතනය විය හැකි බවට අනුමාණ කළ ගොවි මහතා වහාම ඒ දෙසට දුව ගොස් බලනවිට ඔහුගේ අනුමානය නිවැරදි විය. ඒ වනවිටත් නාදවෙමින් හා ආලෝකයද විහිදුවමින් බිම වැටී තිබූ දුරකතනය ඔහුගේ එකම විය. 

මෙම අවස්ථාවේදී දුරකතනය වැටී තිබූ තැනට නුදුරින් බල්ලෙකු ඒ දෙස බලාගෙන සිට තමා දැක පළා ගිය බවත්, අතට ගත් දුරකතනය පරීක්‍ෂා කර බැලීමේදී එහි තිබූ සලකුණු අනුව අදාළ බල්ලා එය රැුගෙන යමින් සිටි බවට තහවුරු වූ බවත් ගොවි මහතා පැවසීය.