(අනුරාධපුර බී.ජී. චතුරංග)
නිවසට ඇතුළු වූ සර්පයකු එළවා දැමීමට උදව් ඉල්ලූ අවස්ථාවේ එහි පැමිණි පිරිස සර්පයා එළවා දමා පිටවී ගිය පසුව රන් ආභරණ කිහිපයක් අස්ථානගතවී ඇති බව කියමින් අනුරාධපුරයේ කාන්තාවක අනුරාධපුර මූලස්ථාන පොලිසියට පැමිණිල්ලක් ඉදිරිපත් කළාය.

 අනුරාධපුර කුලී නිවසක පදිංචිව සිටින අවිවාහක කාන්තාවක් වන ඇය පොලිසියට පැමිණිල්ලක් ඉදිරිපත් කර තිබෙන අතර අස්ථානගත වූ රන් ආභරණ තොගයේ වටිනාකම රුපියල් තිස්දහසකි. 

රෝගීවී සිටි සිය සහෝදරයා සමග නිවසට පැමිණ දොර විවෘත කළ අවස්ථාවේ නිවස තුළ සර්පයෙකු සිටින අයුරු දැක නිවස ආසන්න මාර්ගයේ සිටි පිරිසකගෙන් උදව් ඉල්ලූ බවත් ඒ අවස්ථාවේ නිවස ආසන්නයේ මාර්ගයේ වැඩ කරමින් සිටි පිරිසක් පැමිණ සර්පයා එළවා දැමූ බවත් ඔවුන් නිවසින් පිටව ගොස් මද වේලාවකට පසුව නිවසේ තිබූ රන් ආභරණ සොයද්දී ඒවා තිබූ තැන නොතිබූ  බවත් ඇය පොලිසියට කීවාය.

 රුපියල් තිස් දහසක් වටිනා රන් පෙන්ඩනයක්, මුදු දෙකක් හා කරාබු යුගලක් අස්ථානගතවී ඇති බවට ඈ පොලිසියට පැමිණිලි ඉදිරිපත් කර තිබූ අතර සැකකරුවන් මෙතෙක් අත්අඩංගුවට ගැනීමට පොලිසියට හැකිවී නැත.

 සර්පයා එළවා දැමීමට පැමිණි මාර්ගයේ සේවය කළ පිරිස සොරකම සිදුකළේ ද යන්න සම්බන්ධයෙන් පොලිසියට සැක මතු වී ඇත. අනුරාධපුර මූලස්ථාන පොලිසියේ අපරාධ විමර්ශන අංශය සොරකම සම්බන්ධයෙන් වැඩිදුර පරික්‍ෂණ සිදුකරයි.