කදුරුවෙල සිට අක්කරෙයිපත්තුව බලා ධාවනය වෙමින් තිබූ පෞද්ගලික බස් රථයක් පොළොන්නරුව මඩකලපුව ප්‍රධාන මාර්ගයේ මනම්පිටිය කොටලීය පාලමේ ගැටී කොටලීය ඔයට පෙරළීමෙන් 11 දෙනකු මරුමුවට පත්ව 40 දෙනකු පමණ රෝහල් ගත කිරීමේ පුවත කන වැකීමෙන් මුළු රටම කම්පා වූයේය. සසල වූයේය.

ඉකුත් 9 වැනිදා රාත්‍රී 7.30ට පමණ මෙම අවාසනාවන්ත සිද්ධිය වූ අතර ඉන් දෙදිනකට පසුවත් මාධ්‍ය වාර්තා කර තිබුණේ අනතුරෙන් කොටලීය ඔයේ මළසිරුරු ගසාගෙන ගොස් ඇත්දැයි පරීක්ෂා කරන බවය. අනතුරේ බිහිසුණු බව එමගින් මනාව නිරූපිතය.

ඉපදෙන සැවොම මියයන බව සැබෑවකි. මරණය රැගෙන එන්නේ උපතත් සමගය. එහෙත් ‘‘කාල මරණං - අකාල මරණං’ යනුවෙන් මරණය කොටස් දෙකකට බෙදේ. නිසි ආයු කාලය විඳ මරණයට පත්වීම ‘කාල මරණ’ වන අතර එසේ නොවී මිය යාම අකාල මරණ වේ. කොටලීය ඔයට වැටී මියගිය ජනයා නිසි ආයු කාලය විඳීමෙන් තොරව වෙනත් අයකුගේ නොසැලකිලිමත් බව නිසා මරණයට පත් වූවෝ වෙති. මරණය ඒකාන්ත බව සැබෑ වුව ද මෙලෙස යකඩ තහඩු අතර සිරවී ගංගා ඇළදොළවලට වැටී මියයාම කිසිවෙක් අපේක්ෂා නොකරති.

කොටලීය අනතුරේ උණුසුම පහව යෑමටත් මත්තෙන් තවත් බස්රථයක් කන්ටේනරයක ගැටී තිබේ. අඹන්පොල දී සිදුවූ එම අනතුරෙන් මියගිය ගණන දෙදෙනෙකි. අනතුරෙන් තුවාල ලැබූ පිරිස අඹන්පොල, ගල්ගමුව හා කුරුණෑගල රෝහල්වලට ඇතුළු කරනු ලැබ සිටිති.

මහ මගට පිවිසීම දින නියමයක් නැති මරණ සහතිකයක් සාක්කුවට දමා ගැනීමක් බවට පත්ව තිබේ. පුත්තලම සිට නුවරඑළිය දක්වා ධාවනය වූ සුඛෝපභෝගී බස්රථයක් නුවරඑළිය ගම්පොළ මාර්ගයේ පොලේබොඩ ප්‍රදේශයේ දී පෙරළී යාමෙන් අට දෙනකු තුවාල ලබා ඇත. පැය 24ක් තුළ රිය අනතුරුවලින් 16 දෙනකු මියගොස් 98 දෙනකු තුවාල ලබා ඇතැයි මාධ්‍ය වාර්තාවන්හි සඳහන්ය.

කොටලීය පාලමේ ගැටී ඔයට පෙරලුණ බස්රථයට එම මාර්ගයේ ධාවනය කිරීමට බලපත්‍රයක් නොමැති බව ද වාර්තාවේ. රටේ සෑම මාර්ගයකම ධාවනය කෙරෙන බස්රථ හදිසි පරීක්ෂාවකට ලක් කළ යුතුව තිබේ. බොහෝ බස්රථ ‘යන්තම් ගැට ගසාගෙන’ දුවන බස්රථ බව බැලූ බැල්මට පෙනෙන්නකි. විවිධ වැරැදි නිසා රියැදුරු බලපත්‍රය අත්හිටුවා ඇති පුද්ගලයන් ද රියැදුරු බලපත්‍ර නොගත් පුද්ගලයන් ද බස්රථ ධාවනය කරන බව අනතුරුවලින් පසුව කරන පරීක්ෂණවල දී අනාවරණය වූ අවස්ථා එමටය.

මෙම තත්ත්වය පාලනය කළ හැකි වන්නේ නිරන්තරයෙන් සිදු කරන පරීක්ෂා කිරීම්වලින්ය. එය බොහෝ දුෂ්කර කටයුත්තක් බවට විවාදයක් නැත. එහෙත් රටේ පොදු මහජනයාගේ ජීවිතාරක්ෂාව වෙනුවෙන් කෙතරම් දුෂ්කර වුවද එය ක්‍රියාත්මක කළ යුතුය.

ටයිටන් සබ්මැරිනය මුහුදු පතුළේ පුපුරා යාමෙන් සිව් දෙනකු මියයාමේ ප්‍රවෘත්තිය තවමත් සමාජයේ කතාබහට ලක්වන මාතෘකාවකි. පුද්ගලයන් සිව්දෙනකු එසේ අකාලයේ මියයාමේ සිද්ධිය මිනිස් හදවත් සසල කිරීමට හේතු විය. එම සසලවීමත්, කම්පාව මහ මග මැරෙන සදාකාලික ආබාධිත භාවයට පත්වන මිනිසුන් සම්බන්ධයෙන් ද නිර්මාණය කරන්නේ නම් රිය අනතුරු අවම කර ගැනීමට එය හේතුවක් වනු ඇත. එහෙත් එය එසේ නොවන බව පෙනේ. නොඑසේ නම් මෙතරම් අනතුරු සිදුවීමට ඉඩ නැත. 

අබලන් මාර්ග, පාලම් පිළිසකර කිරීමට ශතයක්වත් නැතැයි ප්‍රකාශ කළේ ජනමාධ්‍ය හා මහා මාර්ග අමාත්‍ය බන්දුල ගුණවර්ධන මහතාය. මෙය වූ කලී ඇඟ හිරිවැට්ටවීමට හේතු වන ප්‍රකාශයකි. එහෙත් තිත්ත ඇත්ත එය ය. රිය අනතුරුවලට රියැදුරන්ගේ නොසැලකිල්ල වාහනවල අබලන් බව මෙන්ම මහා මාර්ගවල නුසුදුසු තත්ත්වය ද හේතු වේ.

රටේ මහා මාර්ග අමාත්‍යවරයා ප්‍රකාශ කරන පරිදි අබලන් මාර්ග, පාලම් පිළිසකර කිරීමට ශතයක් හෝ නොමැති නම් රටේ ඇති පාරවල්වල ගමන් කළ හැකි වනු ඇත්තේ තව දෙතුන් වසරකි. මෙබඳු රටක ඉපදීමට සිදුවීම සම්බන්ධයෙන් රටේ පොදු ජනයා කෙසේ කල්ගත කරන්නේදැයි සිතා ගැනීම ද මෙවන් අවස්ථාවල දී අසීරු නැත. 

(***)