(ඩයනා උදයංගනී)

මැතිවරණය කොමිසම මගින් මහ මැතිවරණය පැවැත්වීමට දිනයක් නියම කර ඇතත් මේ මොහොතේ ආණ්ඩුවේත්, මැතිවරණ අපේක්‍ෂකයින්ගේ මෙන්ම මැතිවරණ කොමිසමේත් අවධානය සම්පූර්ණයෙන් යොමු විය යුත්තේ කොරෝනා වසංගතය මර්දනය කිරීමට යැයි පිවිතුරු හෙළ උරුමයේ නායක, හිටපු පාර්ලිමේන්තු මන්ත‍්‍රී උදය ගම්මන්පිල මහතා ලංකාදීපයට පැවසීය.

මෙම වසංගතය මර්දනය කිරීමෙන් පසු මැතිවරණයට සූදානම් විය හැකි බව ද ගම්මන්පිල මහතා සඳහන් කළේය.

මහ මැතිවරණය පැවැත්වීම සඳහා ලබාදිය හැකි ඈතම දිනයක් ලබාදීමට මැතිවරණ කොමිසම ක‍්‍රියා කර ඇත්තේ පාර්ලිමේන්තුව යළි කැඳවිය යුතු බවට විපක්‍ෂයේ පක්‍ෂ කරන ඉල්ලීම් යටපත් කිරීමට බව ද හෙතෙම කීවේය.

මැතිවරණය දින නියමයකින් තොරව කල්දැමූ දා සිටම පාර්ලිමේන්තුව නැවත කැඳවන ලෙස එක්සත් ජාතික පක්‍ෂය, දෙමළ ජාතික සන්ධානය හා ජනතා විමුක්ති පෙරමුණ බලකිරීම් කළ බව කී හිටපු මන්ත‍්‍රීවරයා ජනතාව විසින් පසුගිය මැතිවරණ දෙකකදීම ප‍්‍රතික්‍ෂේප කළ එම පක්‍ෂවල ඉල්ලීම අනුව කටයුතු කිරීමේ අවශ්‍යතාවක් ජනාධිපතිවරයාට නැතැයි ද සඳහන් කළේය.

ඔවුන් ජනාධිපතිවරයා විසින් පසුගිය කාලයේ ක‍්‍රියාවට නැංවූ යහපත් වැඩපිළිවෙලට බාධා කළ බව ද ගම්මන්පිල මහතා ප‍්‍රකාශ කළේය.