(   සිතුම් චතුරංග)

මසුන් ඇල්ලීමට ගොස් අනතුරට ලක්ව අතුරුදහන්ව සිටි පුත්තලම ප්‍රදේශයේ ධීවරයෙකුගේ මළ සිරුරක් මන්නාරම සිලාවතුර වෙරළට ආසන්නයේදී සොයාගත් බව සිලාවතුර පොලිසිය පවසයි.

සිලාවතුර ධීවරයින් පිරිසක් මසුන් ඇල්ලීමට මුහුදු ගිය අවස්ථාවේ පාවෙමින් තිබූ මළ සිරුර දැක පොලිසිය දැනුම්දී ඇති බවද පොලිසිය පැවසීය.

මියගිය පුද්ගලයා පුත්තලම ප්‍රදේශයෙන් මුහුදු ගොස් ඇති අතර එහිදී ඔහු සහ බෝට්ටුව අනතුරකට ලක්ව දින ගණනක් අතුරුදහන්ව සිටි ධීවරයකු බවද පොලිසිය සඳහන් කළේය.

එලෙස අතුරුදහන්ව මියගොස් ඇත්තේ පුත්තලම ප්‍රදේශයේ පදිංචි රාමයියා ජේසුදාසන් නමැති 47 හැවිරිදි පුද්ගලයෙකුගේ වේ.

පසුගිය 08 වැනිදා පුත්තලම ප්‍රදේශයෙන් මසුන් ඇල්ලීමට මුහුදු ගොස් සිටි අවස්ථාවේ අදාළ පුද්ගලයා බෝට්ටුවෙන් ඇදවැටී අතුරුදහන්ව සිටි බවට පොලිසිය වෙත පැමිණිළි ලැබී ඇතැයිද බවද පොලිසිය පැවසූහ.

නාවික හමුදා සහයෝගයෙන් ගොඩගත් මළ සිරුර පශ්චාත් මරණ පරීක්ෂණ වෙනුවෙන් මන්නාරම රෝහල් මෘත ශරීරාගාරයට යොමුකෙරිණ.සිද්ධිය සම්බන්ධයෙන් සිලාවතුර පොලිසිය වැඩිදුර පරීක්ෂණ මෙහෙයවයි.