(නිමල කොඩිතුවක්කු)

තුනෙන් දෙකේ බහුතර බලයකින් ආණ්ඩුව අයවැය සම්මත කර ගත්තත් ජනමතය අබියස ආණ්ඩුවට තුනෙන් එකවත් නොමැති බව  විපක්ෂ නායක සජිත් ප්‍රේමදාස මහතා පැවසීය.

පාර්ලිමේන්තුවෙන් පිටත ජනතාව ඉදිරියේ දී හැකිනම් තම බලය උරගා බලන ලෙස ආණ්ඩුවට අභියෝග කරන බවත් විපක්ෂ නායකවරයා සඳහන් කළේය.

විපක්ෂ නායක සජිත් ප්‍රේමදාස මහතාගේ සංකල්පයක් මත ක්‍රියාත්මක “නගරයෙන් නගරයට ගමින් ගමට දොරින් දොරට” ජනතා ගැටළු විමසන වැඩසටහන් මාලාවේ තවත් අදියරකට අවිස්සාවේල්ලේ දී එක්වෙමින් ඔහු මේ බව පැවසීය.

රටේ ජනතාව එදා වේල කන්න නොහැකිව සුසුම් හෙළත්දී ආණ්ඩුව ඒ පිළිබඳව කිසිදු තැකීමක් නොකර රටේ සියලු ක්ෂේත්‍ර මහා ව්‍යසනයක් වෙත තල්ලු කොට ඇතැයිද විපක්ෂනායකවරයා පැවසීය.

වර්තමානයේ රටේ පවතින්නේ වෙන්දේසි ආණ්ඩුවක් බවත් රටම නොමග යවමින් ආණ්ඩුව සිදු කරනු ලබන මේ මහා විකිණීමට එරෙහිව සමගි ජන බලවේගය කටයුතු කරන බවත්  විපක්ෂ නායකවරයා එහිදී වැඩිදුරටත් පැවසීය.