(විනීතා එම් ගමගේ)

ප‍්‍රමිතියෙන් තොර ගෑස් සිලින්ඩර සියල්ල ආපසු ගෙන්වා ගෙන නිසි ප‍්‍රමිතියෙන් යුත් ගෑස් සිලින්ඩර පාරිභෝගිකයන්ට ලබා දීමට ගෑස් සමාගම කටයුතු කළ යුතු යැයි පාර්ලිමේන්තු මන්ත‍්‍රිනී ගීතා කුමාරසිංහ මහත්මිය ප‍්‍රකාශ කළාය.

ඒ සඳහා ප‍්‍රතිපාදන නැන්තම් පාර්ලිමේන්තු මන්ත‍්‍රීවරුන්ගේ මාස හයක වැටුප් ඒ සඳහා යොදවා ගන්නට කටයුතු කරන්නැයි රජයෙන් ඉල්ලා සිටින බව ද ඇය පැවැසුවාය.

එසේ වැටුප හය මාසයක් ලබා දෙන්නට තමන් සූදානම් බව ද මන්ත‍්‍රීවරිය කියා සිටියාය.

ගීතා කුමාරසිංහ මහත්මිය මේ බව කියා සිටියේ නාවල පිහිටි ඇගේ නිවසේ පැවති මාධ්‍ය හමුවක් අමතමිනි.

එහි දී තවදුරටත් අදහස් දැක්වූ මන්ත‍්‍රිනිය අද වන විට මෙරට දුප්පත් පොහොසත් වෙනසක් නැතිව කාන්තාවන් අති බහුතරය සිටින්නේ බියෙන් ඇලලෙමින් යැයි ද පැවැසුවාය.

පරණ ගෑස් සිලින්ඩර් තොගයක් ගෙනැවිත් තින්ත ආලේප කර පුරවා බෙදා හැරි බවට ආරංචියක් පැතිර යන්නේ යැයි ද පත් කර ඇති කමිටුව ඒවා පිළිබඳව සොයා බැලීම අනිවාර්යයෙන් කළ යුතු යැයි ද ඇය සඳහන් කළාය.

කොයි මොහොතේ ගෑස් සිලින්ඩරය ගිනි ගනීවි දැයි සැකයෙන් බියෙන් සිටින්නට ජනතාවට සිදුව ඇති මේ මොහොතේ කමිටුවේ නිර්දේශ ඉක්මනින් කි‍්‍රියාත්මක කරන්නට රජය පියවර ගනු ඇතැයි විශ්වාස කරන බව ද කුමාරසිංහ මහත්මිය තවදුරටත් කියා සිටියාය.

(ඡායාරූප: ජයමාල් චන්ද්‍රසිරි)