(අංජුල මහික වීරරත්න)

වියළි කලාපයේ කිරි නිෂ්පාදනය ඉහළ නැංවීමේ තාක්ෂණික සහයෝගීතා ව්‍යාපෘතිය ක්‍රියාත්මක කිරීමට කැබිනට් අනුමැතිය ලැබී ඇත.

වියළි කලාපයේ කිරි නිෂ්පාදනය ඉහළ නැංවීමේ තාක්ෂණික සහයෝගිතා ව්‍යාපෘතියක්, ජපාන ජාත්‍යන්තර සහයෝගිතා නියෝජිතායතනයේ (JICA) රුපියල් මිලියන 300 ක මූල්‍ය ප්‍රදානයක් යටතේ වසර 03 ක කාලයක් සඳහා ක්‍රියාත්මක කිරීමට සැලසුම් කර ඇත.

එම ව්‍යාපෘතිය මඟින් උතුරු, නැගෙනහිර, උතුරු මැද සහ වයඹ යන පළාත්වල දිනකට කිරි ලීටර 20 සිට ලීටර 100 දක්වා පරිමාවක් නිෂ්පාදනය කරන කිරි ගොවි ව්‍යවසායකයින් ඉලක්ක කර ගනිමින් එම කිරි ගොවීන් සඳහා පුහුණු හා අධ්‍යාපනික වැඩසටහන් නිර්මාණය කිරීම, යෝග්‍ය තාක්ෂණික ක්‍රම හඳුන්වා දීම්, තෘණ නිෂ්පාදනය හා සැපයුම ශක්තිමත් කිරීම සහ සෞඛ්‍යාරක්ෂිත ලෙස කිරි නිෂ්පාදනය මෙන්ම කිරි පරිභෝජනය ඉහළ නැංවීම යන අරමුණු සාක්ෂාත් කර ගැනීමට අපේක්ෂා කරනු ලබයි.

ව්‍යාපෘතිය යටතේ අදාළ පළාත් 04 න් එක් පළාතකින් දිස්ත්‍රික්ක 2 බැගින් තෝරා ගනු ලබන අතර, එම දිස්ත්‍රික්ක තුළ පිහිටි පශු වෛද්‍ය කොට්ඨාස 3 බැගින් තෝරා ගෙන, එකී පශු වෛද්‍ය කොට්ඨාසවල ආදර්ශ ගොවි පොළ 3 බැගින් වන පරිදි එකී පළාත් හතරේ ආදර්ශ ගොවි පොළ 24 ක් ස්ථාපිත කිරීමට සැලසුම් කරනු ලැබ තිබේ.

ඒ අනුව, යෝජිත පරිදි වියළි කලාපයේ කිරි නිෂ්පාදනය සංවර්ධනය කිරීමේ තාක්ෂණික සහයෝගීතා ව්‍යාපෘතිය ක්‍රියාත්මක කිරීම පිණිස කෘෂිකර්ම, පශු සම්පත්, ඉඩම් සහ වාරි මාර්ග අමාත්‍යවරයා ඉදිරිපත් කළ යෝජනාව අමාත්‍ය මණ්ඩලය විසින් අනුමත කරන ලදී.