(විනීතා එම් ගමගේ)
ව්‍යවස්ථා සභාවට සිවිල් සමාජය නියෝජනය කරමින් පත් කෙරෙන නියෝජිතයින් තිදෙනා විනිවිද භාවයකින් යුතුව පත් කරන ක‍්‍රමයක් අනුගමනය කරන්නැයි මාර්තු 12 ව්‍යාපාරයේ සාමාජිකයෝ කථානායක කරු ජයසූරිය මහතා හමුවී ඉල්ලීමක්  කර ඇත.


ව්‍යවස්ථා සභාවේ නිල කාලය ඉකුත් සිකුරාදායින් (21) අවසන් වූ  අතර නව නිලධාරි මණ්ඩලය පත් කිරීමට පෙර මාර්තු 12 ව්‍යාපාරයේ නියෝජිතයෝ මෙසේ කථානායකවරයා හමුවී තිබේ.


ඉකුත් සිකුරාදා (21) පාර්ලිමේන්තුවේ දී කථානායකවරයා හමුවී මෙම ඉල්ලීම කළ බව මාර්තු 12 ව්‍යාපාරයේ කැඳවුම්කරු රෝහණ හෙට්ටිආරච්චි මහතා ලංකාදීපයට අද (24)  පැවැසීය. 


මේ සම්බන්ධව අගමැතිවරයා හා විපක්ෂනායකවරයා සමඟ සාකච්ඡා කර යම් පියවරක් ගන්නා බවට කථානායකවරයා පොරොන්දු වූ බව ද හෙට්ටිආරච්චි මහතා සඳහන් කළේය. 


කථානායකවරයා සභාපතිත්වය හොබවන ව්‍යවස්ථා සභාවට අගමැතිවරයා සහ විපක්ෂනායකවරයා නිල බලයෙන් පත්වන අතර ඔවුන් විසින් පත් කරන පාර්ලිමේන්තු මන්ත‍්‍රීවරු දෙදෙනෙක් හා සිවිල් සමාජයේ පුද්ගලයින් තිදෙනෙක් ද ජනාධිපතිවරයා පත් කරන නියෝජිතයෙක් ද අගමැති හා විපක්ෂනායක නියෝජනය කරන පක්ෂ දෙක හැර වෙනත් පක්ෂවලින් එක් නියෝජිතයෙක් ද වශයෙන් නියෝජිතයෝ දස දෙනෙක් ව්‍යවස්ථා සභාවට පත්වෙති. 


කතානායකවරයා සමඟ සාකච්ඡාවට පැෆරල්, රයිට් ටු ලයිෆ්, විශ්ව විද්‍යාල ආචාර්යවරුන්ගේ සංගමය, විද්වත් වෘත්තිකයන්ගේ සංගමය, නීථිය හා සමාජය භාරය, සර්වෝදය, සණස ඇතුළු මාර්තු 12 ව්‍යාපාරයේ සාමාජික  සංවිධාන රැසක් මෙම සාකච්ඡාව සඳහා එක්ව සිටියහ.