කරාපිටිය - ජී.ඩබ්ලිව්.කේ.ප්‍රේමතිලක ද සිල්වා

දකුණේ අග නගරයට සමීප උප නගරයකි. මෙහි වෙළඳ සලක් පවත්වාගෙන යන තැනැත්තෙකි. තම වෙළඳ සලේ කටයුතු කර ගැනීමට තමන්ට තනිවම කරගත නොහැකි වීම නිසා සහායිකාවකගේ සේවය ලබාගෙන තිබිණි.
කෙමින් කෙමින් කාලය ගෙවුනි. මෙම සේවිකාව ඉතාමත් අවංකව තම සේවය ලබාදීම හේතුවෙන් තම ස්වාමියාගේ සිත දිනාගැනීමට සමත්වූවාය.
ඉකුත් දිනක අවශ්‍ය කටයුත්තක් සඳහා වෙ‍ළෙඳසල් හිමියාට අගනුවරට යෑමේ අවශ්‍යතාවයක් පැනනැගුණි. එදිනට පෙරදින වෙළෙඳසල් හිමියා තම සේවිකාව අමතා තමා පසුදින අගනුවරට යන බවත් එදින වෙ‍ළෙඳ සල විවෘතකර වෙළෙදාම් කටයුතු සිදුකරන ලෙසත් සේවිකාවට උපදෙස් දී වෙළඳ සලේ යතුරු ඇයට භාරදුන්නේය.
පසුදින මෙම වෙළඳ සහායිකාව වෙනදාටත් වඩා කලින් පැමිණ වෙළඳ සල විවෘත කර වෙ‍ළෙදාම් කටයුතු ආරම්භ කළාය.

මෙම අතරතුරේදි වෙළඳසල් හිමියාගෙන් දුරකතන ඇමතුමක් මෙම වෙළඳ සහායිකාවට ලැබිණි. එයින් කියැවුණේ තමන් ගමට පැමිණීම ප්‍රමාද වන බවත් එදින වෙළදාම් කරන ලද මුදල එකතුකර ඇතුළතින් තබා යතුර යතුරු පැදියේ කුඩයේ තබා ඊට උඩින් කොළයක් දමා වසන ලෙසත්ය. කරුණු හරිහැටි අවබෝධ කර නොගත් මෙම වෙ‍ළෙඳ සේවිකාව එදින වෙ‍ළෙදාම් කටයුත්තෙන් එකතුවූ මුදල වන රුපියල් 55,000/- එකතු කර ඇතුළෙතින් තබනු වෙනුවට එම මුදල් යතුරු පැදියේ කුඩයේ තබා යතුර වෙළඳ සල තුළ තබා පිටතින් අගුළු දැමිය හැකි ඉබ්බා දමා නිවසට ගියාය.
අනතුරුව මෙකී වෙළඳ සල් හිමියා මහා රෑ පැමිණ යතුරු සඟවා තැබීමට සහායිකාව දුන් උපදෙස් අනුව යතුරු පැදියේ කුඩය පිරික්සීය. වෙ‍ළෙඳ සල් හිමියා උඩ ගොස් බිම වැටිනි. ඒ අවස්ථාවේදී වෙළඳ සල් හිමියාට දක්නට හැකිවූයේ යතුර දමා යාමට උපදෙස් දුන් තැන එදින වෙළදාමෙන් ලැබුණු ආදායම වන රුපියල් 55000/- මිටියක් ගසා රබර් පටියකින් ගැටගසා දමා ඇති බවයි.
සොර සතුරකුට මෙම මුදල් නොයා තමාටම එම මුදල ලැබීම ගැන සතුටු වූ මෙම වෙළඳසල් හිමියාට පසුදින වෙ‍ළෙඳ සල විවෘත කර ගැනීමට ඉබ්බා කැපීම සඳහා අසල සිටින අයකුගේ සහායත් ලබාගැනීමට සිදුවිය.
අනේ කාලේ වනේ වාසේ යැයි සිතමින් මෙම වෙ‍ළෙඳ සහායිකාවගේ නුවණ ගැන සිතා බැලූ කඩ හිමියාගේ මතකයට ආවේ නිදාසිටි රජුගේ සිරුරේ වසා සිටි මැස්සා මැරීම සඳහා කඩුවෙන් කෙටීම හේතුවෙන් රජු ජීවිතක්ෂයට පත්වූ මෝඩ සේවකයාගේ ක්‍රියා කලාපය වැනි දෙයකට තමන්ද මුහුණදුන් බවයි.