පෝද්දල සරත් ආනන්ද ගමගේ 

කැටයකට සිල්ලර කාසි එකතුකළ  පුද්ගලයකුගේ කාසි  කැටය  හදිසියේ හමාගිය සුළඟකට හසුවී  ගසාගෙන ගිය අරුම පුදුම සිද්ධියක්  ගැන  දකුණු පළාතේ අග නගරයෙන් අසන්නට ලැබුණි.
හේ ප්‍රදේශයේ ජනප්‍රිය ටින්කර් බාස්  කෙනෙකි. ඔහු අත තියන ඕනෑම වාහනයක ඇදයක් පළුද්දක් වාෂ්පවන බවට මතයක්ද ප්‍රදේශයේ  ගොඩනැගී ඇති  බැවින් නිතර නිතරම  වාහන හිමිකරුවෝ ඔහු  සොයා  පැමිණෙති. මේ නිසා  තනියම  පටන්ගත්  ව්‍යාපාරයට  මේ වනවිට ගෝලයෝ පස්දෙනෙක්ම  එකතුවී  සිටිති.
මේ  දක්ෂ  ගෝලයන්  සෙට් එක  නිසා  දැන්  ඔහු  මජං  කිට් එක අඳින්නේ හදිසිම  අවස්ථාවකදී  පමණි. ගෝලයින්ට  වැඩ  පවරා ඔවුන්ගෙන්  උපරිම  වැඩගැනීම  දැන් ඔහුගේ රාජකාරිය වී ඇත.
පර්ස්  එකක්  පාවිච්චි  නොකරන  ඔහුගේ  පුරුද්ද නිසා  නිතර නිතර තීන්ත  වර්ග ගෙන ඒමෙන්  අතට  ලැබෙන  සිල්ලර  කාසි මහත්  වදයක්වී  ඇත. ඊට  පිළියමක් ලෙස මොහු ලීටර්  දෙකේ හිස් ප්ලාස්ටික් තීන්ත  බාස්කට් එකකට එම  සිල්ලර කාසි දැමීමට පුරුදුවී  ඇත.

වටිනා කියන බඩු බාහිරාදිය  දමා තිබෙන  තහඩු  අල්මාරිය උඩ මේ කාසි කැටය තබා  ඇති අතර අතට ලැබෙන  හැම සිල්ලර  කාසියක්ම මේකට  දැමීම  දැන් ඔහුගේ දින චරියාව වී  ඇත.
පසුගිය  දිනක  මොහුගේ  හිතවතකු වන දිවයිනේ  ජනප්‍රිය දේශකයකුද වාහනයේ  පළුද්දක්  සාදාගැනීමට  පැමිණ සිටි  අවස්ථාවක හදිසියේම මහා  සුළඟක්  සමග  වැස්සක්  ඇදවැටී ඇත . සුළඟ කෙතෙක් තදට හැමුවේ ද යත්  ගරාජයේ  තිබූ සියලු‍  සැහැල්ලු‍ බඩු  පෙරළී  සුළඟේ ගසා යන්නට විය. ගරාජ් හිමිකරු පුදුමයට  පත් කරමින්  අල්මාරිය උඩ තිබුණු  ඔහුගේ කාසි කැටයද සුළඟට හසුව පෙරළී  බිමට ඇදවැටී  ඇත.
සුළු  මොහොතකින්  සුළඟ  නතර වී  ඇති අතර ඔහු බිමවැටී ඇති කාසි කැටය  අතට ගෙන බලනවිට  එහි තිබී ඇත්තේ  සිල්ලර කාසි දහයක් දොළහක්  පමණි. කාසි  කීපයත්  සමග කාසි කැටය රැගෙන එහි සිටි හිතවත්  මහත්මයා ළඟට පැමිණ  ‘‘දක්ෂ ගෝලයෝ  ඉන්නවනම්  කාසි කැටයක් වුණත්  සරුංගලේ වගේ උඩ යවන්න පුළුවන්  මහත්තයෝ”‍ යැයි පවසා ඇත.
ජනප්‍රිය දේශකයා ඔහු  ඇරයුම්  ලබන දේශන වලදී ‘‘සුළඟට ගසාගෙන ගිය කාසි කැටය”‍ පිළිබඳව සිද්ධියත් සිය කතාවට එකතු කරන  නිසා  මේ සිද්ධිය පළාතේ පමණක් නොව දිවයින පුරාම පැතිරී ගිහින්ලු‍.