(හර්ෂණ තුෂාර සිල්වා)

ලිහිල් මුදල් ප්‍රතිපත්ති ස්ථාවරය අඛණ්ඩව පවත්වාගෙන යෑමට ශ්‍රී ලංකා මහ බැංකුව තීරණය කර ඇත.

ශ්‍රී ලංකා මහ බැංකුව සිය පොලී අනුපාත සියයට එකකින් එනම් පදනම් අංක 100කින් අඩු කිරීමට ඉකුත් ජූලි මාසයේදී පියවර ගත්තේ ය. ඒ අනුව ශ්‍රී ලංකා මහ බැංකුවේ නිත්‍ය තැන්පතු පහසුකම් අනුපාතිකය සියයට 4.50ක් දක්වාත් නිත්‍ය ණය පහසුකම් අනුපාතිකය සියයට 5.50ක් දක්වා අඩු කිරීමටත් එම අවස්ථාවේදී පියවර ගත්තේ ය.

ශ්‍රී ලංකා මහ බැංකුවේ මුදල් මණ්ඩලය ඊයේ (19) රැස් වූ අතර බැංකු පොලී අනුපාත එම අගයවල පවත්වාගෙන යෑමට තීරණය කර ඇත.

ශ්‍රී ලංකා මහ බැංකුව මේ වසරේ දී අවස්ථා හයකදී පොලී අනුපාතික අඩු කළ අතර පොලී අනුපාත අඩු කිරීමෙන් බැංකු ගනුදෙනුකරුවන්ට වේගයෙන් ප‍්‍රතිලාභ ලබා දීමට බැංකු වලට හැකි වනු ඇති බවත් මහ බැංකු අධිපති දේශමාන්‍ය මහාචාර්ය ඩබ්ලිව්.ඩී. ලක්ෂ්මන් මහතා ඉකුත් ජූලි මාසයේ දී පැවැසීය.

එමඟින් වාණිජ බැංකු අතර කෙරෙන ගනුදෙනුවලට අදාළ පොලී අනුපාත පහළ වැටෙන අතර එම නිසා වඅඩු පොලියට ණය නිකුත් කිරීමට වාණිජ බැංකුවලට අවස්ථාව උදා වන බව ද ඔහු කීය .

කෙසේ නමුත් මෙතෙක් ක්‍රියාත්මක කර ඇති ලිහිල් ප්‍රතිපත්ති ක්‍රියාමාර්ගවල සම්පූර්ණ බලපෑම වෙළෙඳපොළ ණය අනුපාතික මගින් තවමත් පෙන්නුම් කර නැති බැවින් ලිහිල් මුදල් ප්‍රතිපත්ති ස්ථාවරය අඛණ්ඩව පවත්වාගෙන යෑමේ අවශ්‍යතාව සැලකිල්ලට ගනිමින් මුදල් මණ්ඩලය ඉහත තීරණය ගෙන තිබේ. ඊට අමතරව ආන්තික ණය ලබාගන්නන්ට සහාය වීම සඳහා ඉහළ අගයක පවතින ඇතැම් පොලී අනුපාතික අඩු කිරීම සඳහා අවශ්‍ය පියවර ගැනීමට ද ශ්‍රී ලංකා මහ තීරණය කර ඇත.

මේ අනුව නිත්‍ය තැන්පතු පහසුකම් අනුපාතිකය සියයට 4.50, නිත්‍ය ණය පහසුකම් අනුපාතිකය සියයට 5.50, බැංකු අනුපාතිකය සියයට 8.50 සහ ව්‍යවස්ථාපිත සංචිත අනුපාතය සියයට 2.00 මට්ටමේ නොවෙනස්ව පවත්වාගෙන යෑමට ශ්‍රී ලංකා මහ බැංකුව තීරණය කර ඇත.