වෛරය පෝෂණය වන හෝ ජාතිවාදය සාමාන්‍යකරණය කරමින් ප්‍රකාශ නිකුත් කරන පාලකයන් ප්‍රතික්ෂේප කරන්නැයි අමෙරිකාවේ හිටපු ජනාධිපති බැරැක් ඔබාමා මහතා ඇමෙරිකානු ජනතාවගෙන් ඉල්ලීමක් කරමින් කියා සිටියේය. 
 
ඔබාමා මහතා මෙම ප්‍රකාශය සිදුකළේ කිසිම පාලකයකුගේ නමක් ප්‍රකාශ නොකරමිනි. එසේ වුවද, ජනාධිපති ඩොනල්ඩ් ට්‍රම්ප් මහතා මෑතකදී කළ අදහස් දැක්වීමකින් පසුව ඔහු මේ බව පවසා තිබිණි. 
 
ඇමෙරිකානු ජනාධිපතිවරයා  ඊයේ(05) කළ ප්‍රකාශයකින්, ජාතිවාදී අදහස් වෙනත් ආකාරයකට හැරවීම සම්බන්ධයෙන්ද,  ප්‍රචණ්ඩත්වය පෝෂණය කිරීම සම්බන්ධයෙන් ද දේශපාලන විචාරකයන්ගෙන් විවේචන එල්ල වී තිබිණි.
 
ඇමෙරිකාවේ ටෙක්සාස් සහ ඔහියොහිදී සිදු වූ වෙඩිතැබීම්වලදී පුද්ගලයන් 31 දෙනෙකු මිය යෑමෙන් පසු ට්‍රම්ප් මහතා මෙම අදහස් පළකර තිබූ අතර එහිදී සුදු ජාතිකයන්ගේ ශ්‍රේෂ්ඨත්වය සම්බන්ධයෙන්ද මහතා පවසා තිබිණි.
 
සංක්‍රමණිකයන් සම්බන්ධයෙන් ට්‍රම්ප් කළ මතභේදකාරී  ප්‍රකාශයට ප්‍රතිචාර දැක්වීමෙන් වැළකී සිටි ඔබාමා මහතා මෙම ප්‍රකාශය පසුව නිකුත් කර තිබිණි.
 
“ඇමෙරිකාවේ ඇතැම් පාලකයන් වෛරය පෝෂණය වන හෝ ජාතිවාදය සාමාන්‍යකරණය කරන ප්‍රකාශ අපි ප්‍රතික්ෂේප කළ යුතුයි. අප වැනි මිනිසුන් දෙස නොබලන, අපගේ ජීවිතයට තර්ජනයක් වන, අනෙකුත් ජාතීන් පහත් මිනිසුන් වර්ගයක් සේ සලකන, ඇමෙරිකාව එක්තරා ආකාරයක මිනිසුන් වර්ගයකට පමණක් අයත් යැයි හඟවමින් ප්‍රකාශ කරන නායකයන් අප ප්‍රතික්ෂේප කළ යුතුයි.
 
අපේ දේශපාලනයේ හෝ පොදු ජීවිතවලදී ඒවාට තැනක් ලැබෙන්නෙ නැහැ. ඇමෙරිකාවේ කීර්තිනාමය ලෙස සලකන, ඉතා ප්‍රබල වන, බහුතර මිනිසුන්, සියලු ජාතීන්, විශ්වාස සහ දේශපාලන පක්ෂ සඳහා කාලය එළඹී ඇති බවට කිසිදු සැකයක් නැහැ” යැයිද හිටපු ජනාධිපතිවරයා පවසා ඇත. 

(බීබීසී ඇසුරිනි)

16844