තුවක්කුකරුවකුගේ වෙඩි පහරින් කුඩා දරුවන් විසිදෙනකුට සහ පුද්ගලයන් හය දෙනකුට ජීවිත අහිමි කළ ඛේදජනක සිද්ධිය වාර්තා වූ ඇමෙරිකාවේ කනෙක්ටිකට් ප‍්‍රදේශයට ඇමෙරිකානු ජනපති බැරැක් ඔබාමා ඊයේ(16) පැමිණියේය. ඉකුත් සිකුරාදා සිද්ධිය සැල වූ වහාම විශේෂ ප‍්‍රකාශයක් කරමින් ජනපති ඔබාමා සඳහන් කළේ වසර ගණනාවක් තිස්සේ ඇමෙරිකාව මෙම අමිහිරි අත්දැකීමට මුහුණ දෙමින් සිටින බවත් තුවක්කු භාවිතය සම්බන්ධයෙන් පැහැදිලි තීරණයක් ගත යුතු කාලය එළඹ ඇති බවත්ය. කනෙක්ටිකට් ප‍්‍රදේශයට පැමිණි ජනපති ඔබාමා සිද්ධියෙන් මියගිය කුඩා දරුවන්ගේ මාපියන් සහ ප‍්‍රදේශවාසීන් හමු විය. සිය මව වෙඩි තබා ඝාතනය කිරීමෙන් අනතුරුව ආයුද සන්නද්ධව සැන්ඩි හුක් ප‍්‍රාථමික පාසලට කඩා වැදුණු විසිහැවිරිදි ඇඩම් ලන්සා නමැති මෙම තුවක්කුකරු කළ වෙඩි තැබීමෙන් කුඩා දරුවෝ සහ පාසලේ විදුහල්පතිවරයා ද ජීවිතක්ෂයට පත් වූහ. සිද්ධියෙන් මියගිය ගියේ අවුරුදු 6ත් 7ත් අතර වයසේ පසු වූ කුඩා දරුවන්ය. තුවක්කු කිහිපයක් අතැතිව පාසලට පැමිණ කළ වෙඩි තැබීමෙන් පසුව ඇඩම් ලන්සා සිය දිවි හානි කර ගත් බව නිව්ටවුන් පොලිසිය සඳහන් කරයි. පාසලේ විදුහල්පති සහ මනෝවෛද්‍යවරිය ඇතුළු වෙඩි තැබීමෙන් මියගිය වැඩිහිටියන් හය දෙනාම කාන්තාවන් බව වාර්තා වේ. මෙවැනි සාහසික කි‍්‍රයාවක් සඳහා ලන්සා පෙළඹවීමට හේතුව කුමක්ද යන්න තවමත් අනාවරණය වී නොමැත. සිද්ධියෙන් මියගිය දරුවන් ඇතුළු පිරිස සිහිපත් කිරීම පිණිස ප‍්‍රදේශවාසීහු රැසක් සැන්ඞ් හූක් පාසල අසලට පෙරේදා පැමිණ සිටියහ. තුවක්කුකරුවන්ගෙන් දරුවන් බේරා ගැනීමට උත්සාහ ගත් අවස්ථාවේදී මියගිය විසිහත් හැවිරිදි වික්ටෝරියා සෝටෝ නමැති ගුරුවරිය මෙහිදී විශේෂයෙන් සිහිපත් කෙරිණි. ‘‘මියගිය අයගෙන් බොහොමයක් සුන්දර කුඩා දරුවන්. උපන්දින, උපාධි උත්සව, විවාහ උත්සව වැනි ජීවිතයේ වැදගත් අවස්ථා විඳ ගැනීමට පෙර ඔවුනට ජීවිතයෙන් සමු ගැනීමට සිදු වුණා.’’ යනුවෙන් සිද්ධියෙන් කම්පනයට පත් ජනපති ඔබාමා පැවැසීය. මෙම සිදුවීමත් සමඟ තුවක්කු භාවිතය පිළිබඳ නව නීති හඳුන්වාදීම සම්බන්ධයෙන් ඇමෙරිකාව තුළ ආන්දෝලනාත්මක තත්ත්වක් මතුව තිබේ. ඊට ප‍්‍රතිචාර දක්වමින් ධවල මන්දිරය කියා සිටියේ වහාම මේ පිළිබඳව අවධානය යොමු කරන බවයි. ඛේදජනක සිදුවීමෙන් කම්පනයට පත් ජනපති ඔබාමා මියගිය දරුවන් සිහිකරමින්...