(ඩයනා උදයංගනී)


ලබන වසරේදී රජයට ගෙවීමට ඇති ඇමෙරිකානු ඩොලර් මිලියන 1,500ක (බිලියන 1.5ක) ණය වාරිකය ගෙවිය යුත්තේ කෙසේද යන්න මේ වන විටත් සැලසුම් කර ඇතැයි ජාතික ආර්ථික සභාවේ මහ ලේකම් මහාචාර්ය ලලිත් සමරකෝන් මහතා පැවසීය. 

හම්බන්තොට වරාය ගණුදෙනුවෙන් ඉතිරි වූ ඇමෙරිකානු ඩොලර් මිලියන 650ක මුදල මේ සඳහා යොදාගත හැකි බව කී මහාචාර්යවරයා ලංකා, මහජන සහ ජාතික ඉතිරිකිරීමේ බැංකුවලින් අන්තර් ජාතිකව ඩොලර් මිලියන 1000ක් ශ්‍රී ලංකා සංවර්ධන බැඳුම්කරවල ආයෝජනයෙන් හා චීන සංවර්ධන බැංකුව මගින් ඩොලර් මිලියන 500ක් ලබාගැනීමෙන් මෙම ණය වාරිකය ගෙවීමට සැලසුම් කර තිබෙන බව ද සඳහන් කළේය.

මෙම ණය වාරිකයෙන් ඩොලර් මිලියන 1000ක් ලබන ජනවාරියේ සහ ඉතිරි ඩොලර් මිලියන 500 අප්‍රේල් මාසයේ ගෙවීමට තිබෙන බව ද ඔහු කීවේය.

ණය ශ්‍රේණිගත කිරීම් පිළිබඳ කටයුතු කරන මූඩීස් ආයතනය විසින් ශ්‍රී ලංකාව ශ්‍රේණිගත කිරීමෙන් පහත දමා ඇතත් එවැනි ගැටලුවක් ශ්‍රී ලංකාවට මතුව නැතැයි හෙතෙම වැඩිදුරටත් කියා සිටියේය.

ශ්‍රී ලංකාව සතු අඩු සංචිත ප්‍රමාණය හා පවතින ආර්ථික හා දේශපාලන තත්ත්වය මත මූඩීස් ආයතනය මෙසේ ශ්‍රේණිගත කිරීම් සිදුකරන්නට ඇතැයි කී මහාචාර්යවරයා ණය ගෙවීම සම්බන්ධයෙන් ශ්‍රී ලංකාවට ගැටලුවක් නැති බවත්, රාජ්‍ය මූල්‍ය ප්‍රතිපත්තිය හා විනය නිසි පරිදි පවත්වාගෙන යාමේ හැකියාවක් ඇති බවත් සඳහන් කළේය.

ණය ගෙවීම සඳහා ඇති බැඳීම 100% ඉටුකිරීමට ශ්‍රී ලංකාව සූදානමින් සිටින බව ද ඔහු කීවේය.
 
ශ්‍රී ලංකාව සතුව මේ වන විටත් ඇමෙරිකානු ඩොලර් බිලියන 7.2ක සංචිතයක් ඇති බව කී මහාචාර්යවරයා ණය වාරික ගෙවීම සම්බන්ධයෙන් ශ්‍රී ලංකාවට ඇති හැකියාව පිළිබඳ කිසිවෙකුත් චකිතයක් ඇතිකර ගත යුතු නැතැයි ද ප්‍රකාශ කළේය.

ඉදිරියේදී වියදම් වැඩිවී ආදායම් අඩුවුවත් යම් යම් වෙනස්කිරීම් තුළින් අයවැය හිඟය පාලනය කර පවත්වාගෙන යාමේ හැකියාවක් තිබෙන බව ද  මහ ලේකම්වරයා පැවසීය.

ශ්‍රී ලංකාවේ දේශපාලන තත්ත්වය සලකා මූඩීස් ආයතනය ඇතැම් තීරණ ගෙන තිබුණේ පසුගිය ජූලි මාසයේ සිට බව ද හෙතෙම කියා සිටියේය.

වර්තමානයේදී ඇති වී තිබෙන ආර්ථික අර්බුදයට හේතු මොනවා ද යනුවෙන් මෙහිදී මාධ්‍යවේදියෙකු නැගූ පැනයකට පිළිතුරු දුන් මහාචාර්යවරයා පැවසුවේ ආර්ථික අර්බුද නිර්මාණය වීම කාලයක් තිස්සේ සිදුවන ක්‍රියාදාමයක ප්‍රතිඵලයක් මිස හදිසියේ දින කිහිපයකින්, මාස කිහිපයකින් ඇති වන තත්ත්වයක් නොවන බවයි.

2014 වසරෙන් පසු ගත වූ කාලයේදී ණය බර සියයට 50කින් වැඩිවීම, ගෙවුම් ශේෂයේ හිඟය ඉහළ යාම, අයවැය හිඟය වැඩිවීම ආදිය මෙම තත්ත්වයට බලපා ඇතැයි ද ලලිත් සමරකෝන් මහතා පැවසීය.

මහාචාර්ය ලලිත් සමරකෝන් මහතා මේ බව පැවසුවේ රජයේ ප්‍රවෘත්ති දෙපාර්තමේන්තුවේදී අද (22) පැවති කැබිනට් තීරණ දැනුම්දීමේ මාධ්‍ය හමුවට එක්වෙමිනි