(නාලක සංජීව දහනායක)
 
සියලුම දෙනාට බියෙන් හා සැකයෙන් තොරව ජීවත්විය හැකි ආරක්‍ෂිත සංවර්ධිත රටක් ගොඩනැගීමට ශ්‍රී ලංකා පොදුජන පෙරමුණේ ජනාධිපති අපේක්ෂක ගෝඨාභය රාජපක්‍ෂ මහතා ක්‍රියාකරනු ඇති බවත් ඒ සඳහා සියලුම දෙනා එකමුතුව සහයෝගය ලබා දිය යුතු බවත් ශ්‍රී ලංකා පොදුජන පෙරමුණේ ජාතික සංවිධාකය බැසිල් රාජපක්‍ෂ මහතා අද (17) පැවැසීය.
 
විවිධාකාරයෙන් අපහාස හා උපහාස විදදරාගෙන ජනතාවගේත් රටේත් යහපත සදහා ගෝඨාභය රාජපක්‍ෂ මහතාගේ ජයග්‍රහණය වෙනුවෙන් කැපවූ සියලුම දෙනාට හෘදයාංගම ස්තූතිය පළකරන බවද ඔහු කීය.
 
බත්තරමුල්ල,නෙළුම් මාවතේ පිහිටි ශ්‍රී ලංකා පොදුජන පෙරමුණු කාර්යාලයේදී අද (17) මාධ්‍ය අදහස් දක්වමින් හෙතෙම මේ බව සඳහන් කළේය.
 
එහිදී රාජපක්‍ෂ මහතා මෙසේද කීය.
 
“බලාපොරොත්තු වූ ආකාරයටම අපි මේ ජනාධිපතිවරණයෙන් විශිෂ්ට ජයක් ලැබුවා. ඒ ලැබූ ජයග්‍රහණය  සතුටින්, සාමයෙන් භුක්ති විඳින ලෙසට මම සියලුම ජනතාවගෙන් ඉල්ලීමක් කරනවා.
 
පහුගිය කාලයේදී මේ රට ඉතාම අඳුරු යුගයකට ගෙනගියා. එවන් රටක් නැවත ගොඩනැගීම එක්කෙනෙකුට හෝ දෙන්නෙකුට කරන්න බැහැ. රට නැවත ගොඩගන්න අපි සියලුම දෙනා එකාවන්ව වැඩ කළ යුතුයි” යැයිද ඔහු කීය.