(නයිනමඩම - චන්දන ප්‍රනාන්දු) 
බුජ්ජම්පොළ විජයගම ප්‍රදේශයේදී මුර සංචාරයක යෙදී සිටි පොලිස් ජීප් රථයක නිලධාරීන් මාර්ගයේ පැමිණි ලොතරැයි අලෙවි කරන යතුරුපැදිකරුවකු ළඟ ලොතරැයි පතක් මිලදී ගැනීමට නැවැත්වූ අවස්ථාවේදී යතුරුපැදිකරු යතුරු පැදිය දමා පළා යාම සම්බන්ධයෙන් සැක සිතූ පොලිස් නිලධාරීන් යතුරු පැදිය පරීක්ෂා කිරීමේදී ලොතරැයි ලෑල්ලට යටින් සඟවා තිබූ නීති විරෝධී කසිප්පු බෝතල් 25 ක් සොයා ගැනීම නිසා පළා ගිය පුද්ගලයා සොයාගෙන පෙරේදා (28) සවස සැක පිට අත්අඩංගුවට ගත් බව දන්කොටුව පොලිසිය පවසයි. 
මෙලෙස අත්අඩංගුවට ගෙන ඇත්තේ විජයගම පදිංචි 38 හැවිරිදි අයෙකු බව පොලිසිය කියයි. 

සැකකරු ලොතරැයි මිලදී ගන්නා ගනුදෙනුකරුවන්ටම මෙලෙස කසිප්පු සිල්ලරට අලෙවි කිරීමේ අතුරු ව්‍යාපාරයක් ද කරගෙන ගොස් ඇති බවට තොරතුරු හෙළි වූ බව පොලිසිය කීය. පොලිස් නිලධාරීන්ව දැක තම යතුරු පැදියත් දමා පළා ගිය පුද්ගලයා ඔහුගේ මිතුරෙකුගේ නිවසේ සැඟව සිටියදී අත්අඩංගුවට ගැනීමට හැකි වූ බව පොලිසිය කීය. 

දන්කොටුව පොලිස් ස්ථානාධිපති පොලිස් පරීක්ෂක තිළිණ හෙට්ටිආරච්චි මහතාගේ මෙහෙයවීමෙන් කොස්තාපල් (36283) ශ්‍යාමාල්, (76091) තෙන්නකෝන් යන නිලධාරීන් සැකකරුව අත්අඩංගුවට ගෙන තිබේ. සැකකරුව මාරවිල අධිකරණයට ඉදිරිපත් කිරීමට නියමිතය.