ගෙවත්තකින් ලබු ගෙඩියක් සොරා ගත් පුද්ගලයකුට ලබු කිරිබතක් උයා ගැනීම සඳහා හාල් සහ පොල් ද ගෙවතු හිමියා විසින්ම සැපයීමේ පුවතක් සාලියවැව ප‍්‍රදේශයෙන් වාර්තා විය.
මෙය සිදු වී ඇත්තේ පසුගිය පසළොස්වක පොහොය දා උදය කාලයේදීය.
සිය නිවෙස ඉදිරිපිට පුංචි ගෙවත්තේ සරුවට හැඳී තිබූ ලබු වැලක ගෙඩියක් හදිසියේම අතුරුදන් වී තිබීම පිළිබඳව විමසිලිමත් වූ ගොවිමහතාට මද වේලාවකින්ම ඊට සිදු වූයේ කුමක්දැයි අනාවරණය කරගත හැකි වී තිබිණි.
ඒ අනුව ඔහුගේ නිවසට මීටර් 500ක් පමණ දුරින් පදිංචි පුද්ගලයකු බීමත්ව පැමිණ ලබු ගෙඩිය සොරාගෙන ගිය බවට එම තොරතුරු හෙළි වී තිබිණ.
මේ ආරංචියත් සමග ගොවි මතා කැකුළු සහල් කිලෝ 01ක් සමග පොල් ගෙඩියක් ද ලබු ගෙඩිය සොරකම් කළ පුද්ගලයාගේ නිවෙසට ලැබෙන්නට සැලැස්වූයේ සොරා ගැන අනුකම්පාවෙන් සිතමිනි.