මෙය දකුණු පළාතේ සිදුවීමකි. තම කුඩා පුතුගේ උපන් දිනය ඉහළින්ම සැමරීමට දෙමව්පියෝ තීරණය කළහ. ඥාති මිත‍්‍රාදීන්ට ආරාධනය කර උදව්වට නැගණියද ගෙන්වා ගත් දරුවාගේ මව එළවළු පිළියෙළ කිරීම නැගණියට සහ අන් අයට පවරා මස් මාළු කැපීමේ කාර්යය තමාම භාරගත්තාය. ලොකු මාළු කුට්ටියක් පිහියෙන් කැපූ ඇය කුකුළු මස්ද කපන්නට වූවාය. මස් ශීතකරණයේ තැබීම නිසා කැපීමට අපහසු වූ බැවින් ”මන්නා පිහියක්” භාවිත කිරීමට සිදුවිය. කුකුළකු කැබලිවලට කැපූ ඇය තවත් කුකුළකු රැගෙන පිහිය ඔසවා වේගයෙන් ගැසුවාය. අවාසනාවකි. පහර වැරදී ඇයගේ වම් අතේ මාපටඟිල්ලේ අග පුරුකේ කොටසක්, නියපොත්තේ කොටසකුත් සමග වෙන්වී ගියේය. වහාම ඇය රෝහලකට ගෙන ගිය අතර සිද්ධිය දුටු ඇයගේ නැන්දනිය අනතුරට මුහුණ පෑ අයගේ නැගණිය අමතා ”දුවේ මසුත් කාලා හමාරයි නොවැ”යි පැවසුවාය. පැය කිහිපයකට පසු අවශ්‍ය ප‍්‍රතිකාරයෙන් පසුව දරුවාගේ මව නිවෙසට රැගෙන ආවාය. සාදයේ වැඩ කටයුතු අන් අය සූදානම් කර තිබිණි. සියල්ලෝම දිවා ආහාරයට වාඩිවූහ. උපන් දිනය සැමරූ පුතාට බත් කවන ලද්දේ පුංචි අම්මාය. ආහාර අනුභව කරන අතරේ පිඟානේ තිබූ දෙයක් දරුවා පෙන්වීය. එය පරීක්ෂා කැරිණි. දරුවාගේ මවගේ වෙන්වුණු ඇඟිලි කැබැල්ල එය බව දැකගත හැකි විය.