දකුණු පළාතේ ප‍්‍රධාන නගරයක ඉන්ධන පිරවුම් හලකි. පසුගියදා එම ස්ථානයට පැමිණියේ ඉන්ධන පිරවුම් හලේ කළමනාකරුගේ ළඟම හිතවතෙකි. මේ දෙදෙනා දේශපාලන වශයෙන් එකිනෙකට විරුද්ධ පක්‍ෂ දෙකකට අයත් වුව ද එය මිතුරුකමට බලපෑවේ නැත. තම සමීප මිත‍්‍රයෙකි. සිය වාහනය ඉන්ධන පිරවුම් හලෙහි පෙට‍්‍රල් නිකුත් කරන පොම්පය ළඟ නතර කළ මිතුරා කළමනාකාර මිතුරා සමග විවාදයක පැටළුණේ ජිනීවා සමුළුවේ මානව හිමිකම් යෝජනා ගැනය. ඉන්ධන පිරවුම් හලේ සේවකයකු පැමිණ කොතරම් තෙල් ගසන්න දැයි ඇසූ විට ඔහු ගණන කියා යළිත් යහළුවා සමග වාග් සටනට පැටළුණේය. විනෝදයෙන් රස බර වදන් භාවිතයෙන් වාදය කෙළවර කළ ඔහු සමු ගත්තේ යහළුවාට විහිළු කරමිනි. එහෙත් වාහනය සමීපයට ආ ඔහුට තරු පෙනුණේය. සේවකයා ඞීසල් වාහනයට ගසා ඇත්තේ පෙට‍්‍රල්ය. එය පෙට‍්‍රල් ටැංකිය අසල නවතා තිබූ හෙයින් සේවකයාට වරදක් කීමට ද බැරිය.