උපකාරක පන්තියක් මගහැර පෙම්සුව විඳීමට ගිය පෙම්වතියන් දෙදෙනකු නිසා එසේ උපකාරක පන්තිය මගහැර පෙම්සුව විඳීමට ගිය තවත් පෙම්වතියන් තිදෙනකු කෙටුකරගත් පුවතක් දකුණේ එක්තරා නගරයකින් වාර්තා වේ. සිද්ධිය සැකෙවින් මෙසේය. එය නව යොවුන් විය ඉක්මවූ තරමක් වැඩිහිටි සිසු සිසුවියන් පිරිසක් සඳහා පැවැත්වෙන උපකාරක පන්තියකි. පන්තිය පැවැත්වෙන අතරතුර ගුරුවරයාගේ ජංගම දුරකථනයට ඇමතුමක් ලැබිණි. ”අන්න සර්ගේ පන්තියෙ ගැහැනු ළමයි දෙන්නෙක් පන්ති කට් කරල අහවල් තැන කොල්ලො දෙන්නෙක් එක්ක ඉන්නවා” දුරකථනය ලද පණිවුඩය එයයි. සිසුවියන් කවුදැයි හඳුනා ගැනීමට දුරකථන ඇමතුමෙන් ලද තොරතුරු ප‍්‍රමාණවත් නොවීය. මෙම සිසුවියන් කොටුකර ගැනීමට කල්පනා කළ ගුරුවරයා පන්තියේ අනෙක් සිසු සිසුවියන් අමතා මෙසේ කීවේය. ”ළමයි දන්නවද මේ මොහොතේ අපේ පන්තියේ ගැහැනු ළමයි දෙන්නෙක් පන්ති කට් කරලා තවත් පිරිමි ළමයි දෙන්නෙක් එක්ක රවුම් ගහනවලූ. ඊළඟ දවසෙ ඒ ළමයි දෙන්නට මාව මුණගැහෙන්න කියන්න. නැත්නම් මම තොරතුරු ඔක්කොම ප‍්‍රසිද්ධ කරනවා කිව්වා කියලත් කියන්න.” මේ කතාව කනින් කොනින් පැතිරී ගියේය. පන්තියේ ඊළඟ දවස උදා විය. ගැහැනු ළමයින් දෙදෙනා වෙනුවට ගැහැනු ළමයින් පස් දෙනෙක් ගුරුවරයා හමුවට පැමිණ සිටියහ. මෙය ගුරුවරයාට මහත් ප‍්‍රශ්නයකි. නමුත් ඔහු ඒ බව හැඟවූයේ නැත. පසුව කරුණු විමසීමේදී අනාවරණය වූයේ එදින එම සිසුවියන් පස්දෙනාම පන්ති කට්කර පෙම්වතුන් සමග කාලය ගතකර ඇති බවයි. ගුරුවරයා හමුවෙන්න යැයි කී පුවත එකිනෙකා විසින් තමන්ට කියන ලද්දක් යැයි ඔවුන් සියලූ දෙනාම සිතූ නිසා මෙසේ පස්දෙනකුම පැමිණ ඇති බව පසුව හෙළි විය.