(මනෝජ් හර්ෂික)

දකුණු පළාතේ ප්‍රධාන නගරයක සංචාරක හෝටලයක උසස් තනතුරක් හොබවන තරුණයකි. දිනක් ඔහු තම කාර්ය මණ්ඩලයේ මිතුරන් දෙදෙනකු ද සමඟ හෝටලයෙහි කිසියම් රාජකාරී කටයුත්තක් සඳහා නගරය වෙත යාමට තීරණය කළේය. හෝටලයේ සිට නගරයට එතරම් දුරක් නොවූ හෙයින් පා ගමනින්ම නගරය වෙත යාමට මිතුරෝ තිදෙනා පිටත් වූහ. හෝටලයේ සිට නගරය වෙත යාමට ඇති කෙටි මාර්ගය වැටී ඇත්තේ උසාවි සංකීර්ණයක් අසලින් වන අතර එම ප්‍රදේශයේ ජනයා මෙන්ම පොලිස් නිලධාරීහු ද එහි රාජකාරියේ නිරතව සිටියහ.

උසාවි සංකීර්ණය ඉදිරිපිට මාර්ගය අසළින් ගමන් කරන මිතුරන් අතරින් එහි සිටින “අප කතා නායකයා” එක්වරම ගමන නතර කර තම ජංගම දුරකතනයෙන් මාර්ගය අසළ ඇති කානුවේ ඡායාරූප කිහිපයක් සටහන් කර ගත්තේය. හෝටල් ක්ෂේත්‍රයට පැමිධෑමට පෙර මෙම තරුණයා අගනුවර ප්‍රධාන විද්‍යුත් මාධ්‍ය ආයතනයක මාධ්‍යවේදියකු ලෙස කටයුතු කළ හෙයින් ඔහු උසාවි සංකීර්ණය අසළ කානු පද්ධතියේ බෝ වී ඇති මදුරු කීටයින් මෙසේ ඡායාරූප ගතකරගෙන ඇත්තේ පුවත්පතක තම මිතුරකුට එම ප්‍රවෘත්තිය ලබාදීමේ අරමුණෙන්ය. උසාවි සංකීර්ණය ඉදිරිපිට මාර්ගයහි කාණුව ඡායාරූප ගත කරන තරුණයා දුටු අසළ පොලිස් මුර පොළෙහි රාජකාරී කටයුතු කරමින් සිටි පොලිස් නිලධාරියකු පැමිණ ජංගම දුරකතනය ඔහු බාරයට ගෙන තිදෙනාම වැඩිදුර ප්‍රශ්න කිරීම සඳහා පොලිස් ස්ථානය වෙත රැගෙන ගියේය. වැඩිදුර පරීක්ෂණ කටයුතු නිමවන තුරු පොලිස් සිර මැදිරියෙහි පැය පහකට අධික කාලයක් ගෙවීමට මිතුරන්ට සිදු වූ අතර මේ අකරතැබ්බය දැනගත් හෝටලයේ සේවය කළ තවත් මිතුරකු තම සගයන් බැලීමට පොලිස් ස්ථානය වෙත ආවේය. තම මිතුරන් තිදෙනා පොලිස් කූඩුවේ සිටිනු දකින ඔහු මහ හඬින් සිනාසී හෝටලයේ අනෙක් අයට පෙන්වීම සඳහා තම ජංගම දුරකතනයෙන් ඔවුන්ව ඡායාරූප ගත කළේය. මෙම සිද්ධිය දුටු පොලිස් නිලධාරියකු “ෆොටෝ ගහන්න මුන්ට තැනක් නොතැනක් නැහැ” යනුවෙන් පවසා ඔහුවද සිර මැදිරියට දැම්මේය. පසුව තවත් පැය පහක පමණ කාලයක් පොලිස් සිර මැදිරියෙහි සිටීමට මිතුරන් තිදෙනාට සිදු වූ අතර පසුව පැමිණි මිතුරාට පොලිසියෙන් පිටව යාමට හැකි වූයේ පසුදා උදෑසනය.