ඉතාලියේ වෑනෙතෝ පළාතේ නගරයක පිහිටි සුප‍්‍රසිද්ධ දේවස්ථානයක් අසලට එම නගරයේ ජීවත්වන ශ්‍රී ලාංකිකයෝ බොහෝ විට පැමිණෙති. එසේ පැමිණෙන ඔවුහු ටික වේලාවක් එම ස්ථානයේ රැඳෙමින් තම හිත මිතුරන් සමග ආගිය තොරතුරු කතාබස් කරති. පියල් ද එම නගරයේම ජීවත් වන්නෙකි.
තරමක් දුරට මත්පැන්වලට ඇබ්බැහි වූවෙකු වන පියල්ට ඉතාලි භාෂාව කතා කිරීමටද හරිහැටි නොහැකිය. දිනක් පියල් තම සති මැද නිවාඩු දිනකදී දේවස්ථානය අසලට ආවේ මිතුරන් මුණගැසීම සඳහාය.
ඒවන විට එම ස්ථානයේ කිසිවකු නොවූ අතර තරමක් දුරට මත්පැන් පානය කර සිටි පියල්ට ලංකාවේ සිට පැමිණි මිතුරකු දුන් බුලත් විටක රස බැලීමට සිතුණි. බුලත් විට හපා කට රතු වූ පියල් කෙළ පාරක් ගැසීය.
වෙරි මත බුලත් විට මත නිසා ඔහුට කැරකැවිල්ලක් ඇති විය. දේවස්ථානය ඉදිරිපිට ඇති කොන්ක‍්‍රීට් බංකුව මත ඇලවුණු පියල්ට සැප නින්දක් ගියේය. ගතවූ නිමේශයෙන් පැමිණි ගිලන් රියක් පියල් රැගෙන රෝහල කරා ඉගිලූණි. මෙය දුටු එම ස්ථානයට එමින් සිටි ලාංකිකයෙක් විගස සිදුවීම එම නගරයේ ඇති ශ්‍රී ලංකා සමිති නිලධාරියකුට සැල කළේය. ඔහු හනික රෝහල කරා ගොස් තත්ත්වය සොයා බැලීය. බුලත් විට හපා කට රතු වූ පියල් ගැසූ රතු පාට කෙළ පාර දුටු ඉතාලි ජාතිකයෙක් විදේශිකයකුගේ කටින් ලේ එන බව පවසා ගිලන් රථයට ඇමතුමක් දී තිබේ. කරුණු කාරණා වටහා දුන් සමිති නිලධාරියා පියල් රැගෙන යළි නිවසට ආවේය.