(කටුගස්තොට - ධම්මික ගුණවර්ධන)

මුළු ගමක් බිය වද්දමින් රාත්‍රි කාලයේ සැරිසැරූ හිස සුන් අවතාරයක් ඌරකු විසින් පළවා හැරි පුවතක් සබරගමු පළාතේ ගම්මානයකින් වාර්තා විය.

වාර්තාවන අන්දමට සිද්ධිය සැකවින් මෙසේයි. නිරන්තරයෙන් මත්පැනින් මත්ව චණ්ඩි පහේ පුද්ගලයකු සේ සිටි ඔහු ගමටම එපා වූයේ ඔහුගෙන් සිදුවන අනේකවිධ නොපනත්කම් හේතුවෙනි.

කෙසේ නමුත් ඉකුත් දිනක ඔහු හදිස්සියේ මිය පරලොව ගියේ ගල් තලාවක් මතින් ගමන් කිරීමේදී පය ලිස්සා වැටී බෙල්ල කැඩීමෙන් වූ අනතුරකින් බව ඒ පිළිබඳව සිදුකළ පශ්චාත් මරණ පරීක්ෂණයෙන් ද සනාථ වී තිබුණි.

සතියක් ඉක්ම යාමටත් මත්තෙන් ඔහු අවතාරයක් වී පොරවා ගත් රෙද්දකින් යුතුව රාත්‍රී කාලයේ කැඩුණු බෙල්ල අතැතිව ගමේ සැරිසැරීම නිසා හදිස්සියේ ගම්මුන් දොට්ට පිළට යාමටවත් මැළිවූයේ එම අවතාරය දැක කිහිපදෙනකුම සිහිසුන් වූ බවට පැතිර ගිය ප්‍රචාරයත් සමගිනි. මේ අතර අදාළ අවතාරය ඉකුත් දිනක බුදු අම්මෝ මාව බේරාගනියෝ යන හඬින් ගම දෙවනත් කිරීමට වූ බැවින් හිත් උණු වූ ගම්මුන් හුළු අතු පවා පත්තු කරගනිමින් ඒ අවතාරය දෙසට දිව යද්දී දැක ඇත්තේ තම බිරිඳ මැදපෙරදිග ගිය ගමේ තරුණයෙකු ඌරෙකුගේ ග්‍රහණයට ලක්ව තැඹිලි කෝම්බයක් හා කළු පැහැති රෙද්දක් සමග වැටී සිටි අයුරුය.

පසුව ගම්මුන් තවදුරටත් ඒ පිළිබඳව සොයා බැලීමේදී හෙළිවී ඇත්තේ කැඩුණු බෙල්ල ලෙස තැඹිලි කෝම්බය සමග පොරොවාගත් රෙද්දෙන් මවාගත් අවතාරයක් ලෙසින් ගමේ නිදහසේ සැරිසරා රාත්‍රියේ තම අනියම් බිරිය සොයා යන අතරතුර අදාළ තරුණයා මේ ඌරු ප්‍රහාරයට ගොදුරු වී ඇති බවකි.