ළඳරු අවදියේදී පැහැර ගෙන ගිය දරුවකු අවුරුදු  විස්සකට පසු නැවත තම සැබෑ දෙමව්පියන් සමග එකතු වීමේ පුවතක් වාර්තා වන්නේ චීනයේ ගුවැන්සෝ නගරයෙනි. ඞී.එන්.ඒ ජාන පරීක්‍ෂණයක් මගින් සනාථ වූ පසු එම හමුව සිදු වී ඇත.

ෂියෝ ජී නම් ඔහු දැන් විසි එක් හැවිරිදි ශිෂ්‍යයෙකි. ඔහුට වයස අවුරුදු දෙකේදී පමණ මව්පියන් සමග සාප්පු සවාරි ගිය අවස්ථාවක ජාවාරම්කරුවකු විසින් පැහැරගෙන ගොස් අසල්වැසි පුජී ප‍්‍රාන්තයේ යුවළකට විකුණා ඇත. 

හුන්ග් ෂවුපින් සහ ලින් සන් නැමැති ඔහුගේ සැබෑ දෙමව්පියන් තම දරුවා සෙවීම නතර කර නොමැත. ඔවුන් මේ පිළිබඳව පොලිසියට පැමිණිලි කැර ඞී.එන්.ඒ වාර්තාද ඉදිරිපත් කර තිබේ. පසුව පොලිසිය දරුවා සොයා ගත්තේය.

දරුවන් නොමැති කම නිසා මිලඳී ගත් බවත්, දරුවා හොරෙන් රැගෙන ආ බවක් ඔහු නොදන්නා බවද ෂියෝ ජී මෙතෙක් හදා වඩාගත් පියා සඳහන් කළේය.

”මා හදා ගත්ත අම්මයි තාත්තයි ඇත්තටම ශ්‍රේෂ්ඨ අය. මට දැන් අම්මලා දෙන්නයි තාත්තලා දෙන්නයි. මම මේ දෙගොල්ලන් සමගම සබඳතා පවත්වනවා” යනුවෙන් ෂියෝ ජී පවසා තිබේ.

මෙම සිද්ධියෙන් පසු මෙවැනි සිද්ධී විශාල ප‍්‍රමාණයක් වාර්තා වූ බව එරට පොලිසිය සඳහන් කරයි.