උපුල් වික්‍රමසිංහ
ශීඝ්‍රයෙන් ඉහළ ගොස් ඇති පොල් මිල පාලනය කිරීමේ පියවරක් වශයෙන් ඉකුත් බ්‍රහස්පතින්දා (24) පැවැති පොල් වෙන්දේසියේදී පොල් ගෙඩියක මිල රුපියල් 105ක මට්ටමක පවත්වා ගෙන යෑම සඳහා කළ ඉල්ලීමට කර්මාන්තකරුවන් එකඟ වූ බව ද ඒ අනුව වෙළෙඳපොළේ පොල් ගෙඩියක මිල එම මට්ටම දක්වා අඩු වෙතැයි අපේක්ෂා කරන බව ද පොල් සංවර්ධන අධිකාරියේ ප්‍රකාශකයෙක් ඉරිදා ලංකාදීපයට පැවසීය.

පොල් ඵලදාව අඩුවීම හමුවේ පොල් ආශ්‍රිත කර්මාන්තකරුවන්ගෙන් පොල් සඳහා ඇතිවී තිබෙන අධික ඉල්ලුම හේතුවෙන් පොල් මිල ඉහළ ගොස් ඇතැයි කී එම ප්‍රකාශකයා, ලබන 31 වැනිදා පැවැත්වෙන පොල් වෙන්දේසියේදී ද පොල් ගෙඩියක මිල රුපියල් 100 ත් 105 ත් අතර අගයක පවත්වා ගෙන යෑමට සාකච්ඡා කරන බව ද ප්‍රකාශ කළේය. 
වසරකට පොල් ගෙඩි මිලියන 20 ක් පමණ අපනයනය කරන බව ද, උද්ගතව ඇති පොල් හිඟය හමුවේ එය අධෛර්යවත් කිරීම වෙනුවෙන් අපනයනය කරන පොල් ගෙඩියක් සඳහා අය කරන රුපියල් 10 ක සේවා ගාස්තුව රුපියල් 20 දක්වා වැඩි කරන බව ද ඔහු සඳහන් කළේය.