(සුමිත් පොතුපිටිය සහ දයා හේමන්ත සිල්වා)

නීති විරෝධීව ගවයින් සොරකම් කිරීමට පැමිණ බවට සැකකර සුඛෝපභෝගී වෑන් රථයක් අද අලුයම වස්කඩුව ගාලුපාරේ දී අධිබලැති විදුලි රැහැන් සහිත ට්‍රාන්ස් පෝමරයක ගැටී දෙදෙනකු රෝහල් ගතකර ඇති බවත් එහි පැමිණි අනෙක් පුද්ගලයන් පලාගොස් ඇති බවට තොරතුරු ලැබී ඇතැයි කළුතර උතුර පොලිසිය පවසයි .

තුවාල ලැබූ දෙදෙනකු පානදුර මූලික රෝහලට ඇතුලත් කර ඇති බවත්, පලා ගිය පුද්ගලයන් සොයා පරීක්ෂණ සිදුකරන බවත් පොලිසිය කියයි.

වෑන් රථයේ ඉදිරිපස අංක තහඩුව දක්නට නොතිබූ අතර , එය රථය තුල තිබී පොලිසිය සොයාගෙන ඇත.

වෑන් රථයේ පසුපස අසුන් සියල්ල ගලවා ඉවත්කර තිබූ අතර, ගවයින් ගැට ගැසීමට රැගෙන ආ බවට සැකසිතිය හැකි කඹ කිහිපයක් ද රථය තුල දැකගත හැකිවිය.

රථය තුළ ගවයින් සිටී බවට දුගදක් හමන බවද, අනතුර සිදුවන අවස්ථාවේ ගවයින් සිටීන්නට ඇති බව ප්‍රදේශවාසීන් පැවසීය .

අනතුරත් සමගින් ප්‍රදේශයේ විදුලිය මුළුමනින්ම විසන්ධි වී ඇති අතර , ගාලු මහා මාර්ගය අධිබලැති විදුලි රැහැන්වලින් අවහිරවීම හේතුවෙන් ගාලුපාරේ වාහන ගමනාගමනයට බාධා වී තිබුණි .