හුණුගල් ප්‍රවාහන ඇරැඹීම නිමිත්තෙන් දුම්රියේ ඇත්තන්ට මධු සාදයක

(විනීතා එම් ගමගේ)

ගාල්ලේ පිහිටි සිමෙන්ති කම්හලට හුණුගල් ගෙන ඒම ආරම්භ කිරීම නිමිත්තෙන් ශ්‍රී ලංකා දුම්රිය සේවයේ නියාමකවරුන් හා රියැදුරු මහත්වරුන් වෙනුවෙන් පුත්තලමේ පිහිටි තරු හෝටලය දී යළිත් මත්පැන් සාදයක් පවත්වා ඇතැයි දුම්රිය දෙපාර්තමේන්තු ආරංචි මාර්ග පවසයි.

මෙම සාදයට නියාමකවරුන් ගේ සංගමය නියෝජනය කරමින් නියාමකවරුන් පිරිසක් හා රියැදුරු සංගමය නියෝජනය කරමින් රියැදුරන් පිරිසක් ද සහභාගි වී ඇති අතර ඒ සඳහා එම පිරිස සාදයට ගොස් ඇත්තේ නියාමක පරික්ෂකවරයා වෙනුවෙන් වෙන් කර ඇති කැබ් රථයෙනි.

පුත්තලම අරුවක්කාඩුවෙන් ලබා ගන්නා හුණුගල් පුත්තලම සිමෙන්ති කමහලට ගෙන යන්නේ දුම්රිය ගැල් මගින් වන අතර ගාල්ලේ පිහිටි සිමෙන්ති කම්හලට ද අරුවක්කාඩුවෙන් හුණුගල් ගෙන ඒම ආරම්භ කිරීම සඳහා දුම්රිය දෙපාර්තමේන්තුව හා සිමෙන්ති සමාගම අතර ගිවිසුමක් අස්සන් කරනු ලැබ ඇත.

ඒ අනුව හුණුගල් ගෙන ඒම ආරම්භ කළ අතර ඊට පෙර අදාල සමාගම රියැදුරන් හා නියාමකවරුන් වෙත විශේෂ මත්පැන් සාදයක් පවත්වා ඇත.

මීට පෙර අවස්ථාවක දී ප‍්‍රිමා සමාගමේ පිටි දුම්රියෙන් ගෙන ඒම ආරම්භ වූ අවස්ථාවේ දීද දුම්රිය නියාමකවරුන් හා රියැදුරන් පිරිසක් එම සමාගම විසින් ත‍්‍රිකුනාමලයේ තරු හෝටලයක දී පැවැත්වූ සාදයකට සහභාගි වී තිබු අතර දුම්රිය සාමාන්‍යධිකාරිවරයාගේ වාහනයෙන් ගොස් එයට සහභාගිවී තිබුණත් මේ වනතුරුත් ඒ පිළිබඳව කිසිදු පරික්ෂණයක් පවා සිදු වී නැතැයි එම දෙපාර්තමේන්තු ආරංචි මාර්ග සඳහන් කරයි.

කෙසේ වෙතත් රාජ්‍ය නිලධාරින් මෙසේ සමාගම්වලින් ලබා දෙන මත්පැන් සාද සඳහා සහභාගි වීම අනුමත කළ නොහැකියැයි මේ සම්බන්ධව අදහස් දක්වමින් දුම්රිය දෙපාර්තමේන්තුමේ ජ්‍යෙෂ්ඨ නිලධාරියෙක් ලංකාදීපයට පැවැසීය.