(රවින්ද්‍ර ප්‍රභාත් නෙත්තසිංහ)

කුරුණෑගල නගරයේ අපොස සාමාන්‍ය පෙළ උපකාරක පංතියකට සහභාගී වූ සිසුන් දෙදෙනකුට තවත් තරුණයන් පිරිසක් පැමිණ පහරදෙන වීඩියෝවක්  මේ දිනවල සමාජ මාධ්‍ය තුළ සංසරණය වෙමින් පවතී.
මෙසේ පහරකෑමට ලක්වූ සිසුන් දෙදෙනා මේ වනවිට තුවාල ලබා කුරුණෑගල ශික්ෂණ රෝහලට ඇතුලු කර තිබේ.

මෙම සිසුන් දෙදෙනාට ඊයේ (28) දහවල් 11.30 ට පමණ මෙසේ පහරදී ඇත්තේ කුරුණෑගල නුවර පාරේ පිහිටි උපකාරක පංතියක් අසලදීය.

පංතියේ විවේකයක් ලබාදුන් අවස්ථාවේ දී පිටතට පැමිණි විට පහරදීමට ලක්වූ බව එම සිසුහු කියති.

ඔවුන් දෙදෙනා කියා සිටින්නේ පහරදීමට හේතුව විමසීමේදී හේතු නොදන්වා දිගින් දිගටම පහරදුන් බවයි.

පහරකෑ සිසුන් දෙදෙනාගේ මාපියන් කුරුණෑගල මූලස්ථාන පොලිසියට පැමිණිලි කර ඇති අතර ඔවුහු වාරියපොල ප්‍රදේශයේ පදිංචිකරුවෝ වෙති.

පහරදීමට පැමිණි තරුණයන් සොයා පොලිස් පරීක්ෂණ ආරම්භ කර ඇත.
සිසුන් බිය වද්දා බලහත්කාරයෙන් මුදල් එකතුකිරීම වැනි කටයුතු වල යෙදෙන කණ්ඩායම් සිටින බවට බවට නිතර පැමිණිලි ලැබෙන බවද පොලිසිය පැවසිය.