ස්වේච්ඡා නාවික හමුදාවේ වාර්ෂික කඳවුර නිමවෙයි

ශ්‍රී ලංකා ස්වේච්ඡා නාවික හමුදා වාර්ෂික කඳවුරේ අංශ පිරික්සුම නාවික හමුදාපති වයිස් අද්මිරාල් පියල් ද සිල්වා මහතාගේ ප්‍රධානත්වයෙන් අද (19) වැලිසර, ශ්‍රී ලංකා නාවික නෞකා ලංකා ආයතනයේ සරඹ පිටියේ දී පැවැත්විණි.

ස්වේච්ඡා නාවික හමුදාවට අයත් නාවික පුද්ගලයන්ගේ වෘත්තීමය හැකියාවන් සහ දැනුම වර්ධනය කිරීම උදෙසා පසුගිය ජනවාරි 3 වැනි දා ආරම්භ කෙරුණු මෙම පුහුණු කඳවුර නාවික හමුදාපතිතුමාගේ අංශ පිරික්සුම සහ ආචාර පෙළපාළියකින් පසුව විචිත්‍රවත් සංස්කෘතික සංදර්ශනයකින් පසුව නිමාවට පත්විය.

ස්වේච්ඡා නාවික හමුදාව 1952 ජනවාරි මස 09 වැනි දා නිලධාරින් 24 දෙනෙකු හා නාවිකයින් 121 දෙනෙකුගෙන් යුක්තව ආරම්භ විය.

ජාතික ආරක්‍ෂාව හා සංවර්ධන අවශ්‍යතාවයන්ට සමගාමීව මේවන විට නිලධාරින් 461 දෙනෙකු හා නාවිකයින් 11700 දෙනෙකුගෙන් සැදුම්ලත් ජාතික මෙන්ම හදිසි අවස්ථාවන්හි දී සහ ව්‍යසනයන්හිදී විශේෂඥ දැනුම හා පිරිස් බලය ලබා දීමට නිරන්තරයෙන් සූදානම්ව සිටින බල හමුදාවක් බවට පත්වී ඇත.

එම අවස්ථාව සඳහා බටහිර නාවික විධානය බාර ආඥාපති සහ ස්වේච්ඡා නාවික හමුදාවේ ආඥාපති, රියර් අද්මිරාල් නිශාන්ත උළුගේතැන්න මහතා, නාවික හමුදා අධ්‍යක්ෂ ජනරාල්වරුන් ඇතුළු නාවික හමුදා මුලස්ථානයට සහ බටහිර නාවික විධානයට අනුයුක්ත ජ්‍යෙෂ්ඨ නිලධාරීන් රැසක් මෙන්ම ස්වේච්ඡා නාවික හමුදාවේ අණදෙන නිලධාරී කපිතාන් ටෝනි පෙරේරා මහතාද සහභාගී වී සිටියහ.