(සුජිත් හේවාජුලිගේ )

සියලුම ගොවීන්ට දියර නයිට්‍රජන් ඉදිරියේදී ලබාදීමට රජය කටයුතු කරන බව ජනාධිපති ගෝඨාභය රාජපක්ෂ මහතා අද (21) පැවැසීය.

හරිත කෘෂිකර්මාන්තයේ අරමුණ සහ ඉලක්කය එක් කන්නයකට දෙකකට පමණක් නොව පරම්පරා ගණනාවකට සෙත සැලසීම බවද හෙතෙම සඳහන් කළේය.

ජනාධිපතිවරයා මෙසේ පැවසුවේ ගොවිජන සේවා නිලධාරීන් සමග වීඩියෝ තාක්ෂණය ඔස්සේ අද පස්වරුවේ පැවති සාකච්ඡාවකදීය.

හරි දේ කිරීම විශාල අභියෝගයක් බවත් ඊට සාර්ථකව මුහුණදී ඉදිරියට යෑමෙන් අපේක්ෂිත අරමුණු ජයග්‍රහණය කළ හැකි බවත් ගෝඨාභය රාජපක්ෂ මහතා කීවේය.

ගොවීන් මුහුණ දෙන අපහසුතාවලට විසඳුම් දීමෙන් අපේක්ෂිත අරමුණු කරා ගමන් කළ හැකි බව මෙහිදී පෙන්වා දුන් ජනාධිපතිවරයා ගොවීන් හමුවට ගොස් කරුණු පැහැදිලි කරදීම ඉතා වැදගත් බවද සඳහන් කළේය.

පරිසරයත් මහජන සෞඛ්‍ය ආරක්ෂාවත් රැකගනිමින් වැඩි ආදායමක් ගොවියා අතට පත් කිරීම රජයේ ප්‍රමුඛ අපේක්ෂාව බවද කාබනික පොහොර භාවිතය සමග ඉදිරියට යෑමට ගොවීන් දිරිගැන්වීම සියලු දෙනාගේ වගකීමක් බවද ජනාධිපතිවරයා පැවැසීය.