(නිමන්ති රණසිංහ) 

සබරගමුව ජ්‍යෙෂ්ඨ නියෝජ්‍ය පොලිස්පතිවරයකු ඇතුළු නිලධාරීන් දෙදෙනෙක්  තරුණයකු වටකරගෙන ඇතිවන යම් නොසන්සුන් තත්ත්වයක් සහිත වීඩියෝවක් සමාජ මාධ්‍යවල හුවමාරුවෙමින් තිබේ.

රත්නපුර කිරිඇල්ල මාර්ගයේ ගොරකඇල ප්‍රදේශයේදී ඊයේ (25) සවස තුනට පමණ සිදුවී ඇති මෙම සිදුවීම සහිත වීඩියෝව මේ වන විට සමාජ මාධ්‍ය හරහා හුවමාරු වෙමින් ඇත.

පොලිස් මූලස්ථානය නිවේදනයක් නිකුත් කරමින් සඳහන් කර ඇත්තේ සබරගමුව ප්‍රදේශයේ රාජකාරි කරනු ලබන ජ්‍යෙෂ්ඨ පොලිස් නිලධාරියෙකුගේ අපකීර්ති දායක හැසිරීමක් සම්බන්ධයෙන් මේ වන විට පරීක්ෂණයක් ආරම්භ කර ඇති බව ය .

ජ්‍යෙෂ්ඨ නියෝජ්‍ය පොලිස්පතිවරයා නිලධාරීන් කිහිප දෙනෙක් සමග කිරිඇල්ල දෙසට ගමන්කරමින් සිටියදී ඔවුන් ගමන්ගත් මෝටර් රථයට පසුපසින් පැමිණි තවත් මෝටර් රථයක් ඉස්සර කිරීමට යාමේදී ඇතිවූ තත්ත්වයක් මත මෙය සිදු වූ බවට වාර්තා වේ.

අපරික්ෂාකාරීව රිය ධාවනය කිරීමක් කල බවට චෝදනා කරමින් නිල ඇඳුමෙන් සැරසුණු පොලිස් නිලධාරීන් තිදෙනෙක් අනෙක් මෝටර් රථයේ රියදුරු ලෙස කටයුතු කළ තරුණයා බෙල්ලෙන් අල්ලාගෙන පොලිස් ජීප් රථය දෙසට රැගෙන එන අයුරු වීඩියෝවෙන් දැක්වේ.

පසුව ජ්‍යෙෂ්ඨ පොලිස් නිලධාරියා එම තරුණයාගෙ හිසට පහර දෙන අයුරු ද එම වීඩියෝවේ දැක්වේ. ඒ අවස්ථාවේදී තරුණයා ප්‍රකාශ කර සිටින්නේ පොලිස් නිලධාරීන් බීමතින් සිටින බවකි. 

තරුණයා විසින් බීමතින් සිටින බවට චෝදනා කරනු ලැබීමෙන් පසු ජ්‍යෙෂ්ඨ නියෝජ්‍ය පොලිස්පතිවරයා ඔහු පැමිණි රථයට ගොඩ වන අයුරු ද එහි දිස් වෙයි.

පසුව විටින් විට පොලිස් රථයේ සවි කර තිබු (සයිරන් නලාව) අණතුරු ඇගයීමේ සංඥාව නාද කරන අයුරු ද වීඩියෝවේ පැහැදිලව සදහන්වී ඇත.