(අංජුල මහික වීරරත්න)

අල්ලස සහ දූෂණයයෙන් තොර සුපිළිපන් රාජ්‍ය සේවයක් ගොඩනැංවීම සඳහා රජය ගෙන යන වැඩපිළිවෙළට අනුව අභ්‍යන්තර කටයුතු ඒකක පිහිටුවීමට උපදෙස් ලබා දුන් රාජ්‍ය ආයතන 250හි ආයතන ප්‍රධානීන් දැනුවත් කිරීමේ වැඩමුළුවක් ජනාධිපති ලේකම් ආචාර්ය නන්දික සනත් කුමානායක මහතාගේ ප්‍රධානත්වයෙන් අද (29) ශ්‍රී ලංකා පදනම් ආයතන ශ්‍රවණාගාරයේදී පැවැත්විණි.

මෙම වැඩපිළිවෙළෙහි පළමු පියවර ලෙස රාජ්‍ය ආයතන 106ක අභ්‍යන්තර කටයුතු ඒකක පිහිටුවා එම නිලධාරීන් පුහුණු කිරීම මීට පෙර සිදු කරන ලද අතර, එහි දෙවන පියවර ලෙස තවත් රාජ්‍ය ආයතන 250ක අභ්‍යන්තර කටයුතු ඒකක පිහිටුවීමට උපදෙස් ලබා දෙන ලදී. ඒ අනුව ක්ලීන් ශ්‍රී ලංකා වැඩසටහනේ අනුග්‍රහය යටතේ ජනාධිපති ලේකම් කාර්යාලය මෙම වැඩමුළුව සංවිධානය කළේය.

ශ්‍රී ලංකාව අධ්‍යාපනය, සෞඛ්‍ය වැනි ක්ෂේත්‍රයන්හි ශ්‍රේණිගත කිරීම්වල ඉහළ ස්ථානයක රැඳී සිටියත් 2024 දූෂණ සංජානන දර්ශකයේ ශ්‍රී ලංකාවට හිමි වන්නේ 121 වන ස්ථානය බවත් එය අනෙක් ක්ෂේත්‍රයන්හි ශ්‍රේණිගත කිරීම්වලට අහිතකර ලෙස බලපෑ හැකි බවත් මෙහිදී අදහස් දැක් වූ ජනාධිපති ලේකම් නන්දික සනත් කුමානායක මහතා සඳහන් කළේය.