(ආනන්ද ඉ ජයකොඩි)

සන්නිවේදන කුළුණු වල සවි කොට ඇති රුපියල් ලක්ෂ ගණනක් වටිනා බැටරි මහ රෑ හොරෙන් ගලවා ගෙන ගොස් ඇති බැටරි සොරෙකු අත් අඩංගුවට ගැනීමට හැකි වූ බව  වීරගුල පොලීසිය අද(07) උදෑසන පැවසීය.

මීවල සන්නිවේදන කුළුණේ සවිකොට තිබූ බැටරි හතරක් සොරා ගෙන යාම පිළිබඳව මූලික පරීක්ෂණ පවත්වා ගෙන යද්දී ලද තොරතුරකට අනුව පස්යාල ප්‍රදේශයේ නිවසක් සෝදිසි කළ අවස්ථාවේ  සොරා ගෙන ගොස් තිබූ බැටරියක් සමග සැකකාර හොරා අත් අඩංගුවට ගත් බවද පොලීසිය කීය.

මොහු කාලයක්  කොන්ත්‍රාත් පදනම යටතේ සන්නිවේදන කුළුණු අලුත් වැඩියා කළ අයෙකු බවත්, එම කාලයේ සන්නිවේදන කුළුණු වල බැටරි තැන්පත් කොට ඇති ආරක්ෂක පෙට්ටිවලට අදාල යතුරු නමයක් සොරා ගෙන තිබූ බවත් එම යතුරු උපයෝගී කර ගෙන බැටරි සොරා ගෙන යාම් සිදු කරන බව ඔහුගෙන් ප්‍රශ්න කිරීමේදී හෙළි වී ඇත.

මොහු තවත් පුද්ගලයෙකු සමග එක්ව දිවයිනේ  විවිධ ප්‍රදේශවල සන්නිවේදන කුළුණු දහයක බැටරි සොරා ගෙන යාම් පිළිබඳව තොරතුරු හෙළි වී ඇති බවත් එම බැටරි සැගවී  සිටින  පුද්ගලයා විකුණා ඇති හෙයින් ඔහු අත් අඩංගුවට ගැනීම සඳහා වැඩිදුර පරීක්ෂණ පවත්වාගෙන යන බවද පොලීසිය කීය.

ගම්පහ ජ්‍යෙෂ්ඨ පොලිස් අධිකාරී ඉන්දික සිල්වා හා ගම්පහ සහකාර පොලිස් අධිකාරි (2) පී ජේ අතුකෝරල යන මහත්වරුන්ගේ උපදෙස් පරිදි වීරගුල පොලිස් ස්ථානාධිපති ප්‍රධාන පොලිස් පරීක්ෂක ටී බී ඇස් කල්‍යාණතුංග මහතාගේ මෙහෙයවීම යටතේ එහි පොලිස් සැරයන් නිශාන්ත (15427), පොලිස් කොස්තාපල් වරුන් වන යාපා(88691), නිලංක(33577), සේනාධීර (93493) හා පද්මසිරි (95364) යන මහත්වරු වැටලීමට සහභාගි වූහ.