(ටී.කේ.ජී.කපිල)

වැඩිම සංචාරකයන් පිරිස වූ 23,33, 795 ප්‍රමාණය අභිබවා යමින් මෙරටට පැමිණි 23, 33, 796 වැනි සංචාරකයා  පිළිගැනීමේ චාම් උත්සවයක් කටුනායක ගුවන්තොටුපොළ ‘‘සිල්ක්රූට්‘‘ මගී පර්යන්තයේ දී අද උදෑසන සංවිධානය කර තිබුනි.

සංචාරක කටයුතු පිළිබද නියෝජ්‍ය අමාත්‍ය මහාචාර්ය රුවන් රණසිංහ මහතාගේ ප්‍රධානත්වයෙන් මෙම  උත්සවය පැවැත්වණි.

මෙතෙක් ශ්‍රී ලංකාවට වැඩිම සංචාරයන් පැමිණි වසර වූ 2018 වසරේ පැමිණි සංචාරකයන් ප්‍රමාණය ඉක්මවා යමින් 23,33,796  සංචාරකයා ලෙස  දකුණු ඉන්දියාවේ කේරළ ප්‍රාන්තයේ සිට , එරට විශ්ව විද්‍යාල ආචාර්යවරයෙක් වූ ෆීලික්ස් බෙස්ලින්,  ඔහුගේ බිරිඳ වූ , විශ්‍රාමික පාසල් ගුරුවරියක වූ රීනා ෆර්ඩිනැන්ඩස් මහත්මිය සහ ඔවුන්ගේ දියනිය වූ , වෛද්‍ය ඈන් ක්‍රිස්ටිනා පෙරේරා මෙනවිය ද පැමිණියහ.

ඒ අනුව මෙම 2025 වසර ශ්‍රී ලංකාවට වැඩිම සංචාරකයන් පිරිසක් පැමිණි වසර බවට පත් වීමට නියමිතය.

ඔවුන් පිළිගැනීම සදහා සංචාරක කටයුතු පිළිබද නියෝජ්‍ය අමාත්‍ය මහාචාර්ය රුවන් රණසිංහ , ශ්‍රී ලංකා සංචාරක ප්‍රවර්ධන කාර්යාංශයේ සභාපති සහ ශ්‍රී ලංකා සංචාරක සංවර්ධන අධිකාරියේ සභාපති බුද්ධික හේවාවසම් මහතා ඇතුළු මෙරට සංචාරක ක්ෂේත්‍රයට සම්බන්ධ විශාල පිරිසක් ද කටුනායක ගුවන් තොටුපොළ " සිල්ක් රූට් " මගී පර්යන්තය වෙත පැමිණ සිටියහ .